Túrkistan oblysynda jol sapasyna qatysty 60-tan astam kemshilik anyqtalǵan

TÚRKІSTAN. QazAqparat – Túrkistan oblysynda jańadan tóselgen avtokólik joldarynyń sapasy men qaýipsizdigin arttyrý maqsatynda júıeli jumystar atqarylýda. QR Sybaılas jemqorlyqqa qarsy is-qımyl agenttiginiń janynan qurylǵan «Sapaly jol - adaldyq alańy» jobasy aıasynda oblystyq, aýdandyq jáne jergilikti joldardyń sapasyna turaqty negizde baqylaý júrgizilip keledi, dep habarlaıdy QazAqparat tilshisi.

Agenttiktiń Túrkistan oblysy boıynsha departamentiniń bastamasymen «Ulttyq jol aktıvteri sapasy ortalyǵy» RMK Túrkistan oblysy boıynsha fılıalynyń qyzmetkerleri jáne «Túrkistan - adaldyq alańy» jobalyq keńsesiniń, arnaıy monıtorıng toby músheleriniń qatysýymen oblysqa qarasty avtomobıl joldarynyń sapasy jiti qadalaǵanyp keledi.

Bıyl monıtorıng tobynyń músheleri óńirge qarasty 6 qala-aýdanda, sonyń ishinde Túrkistan, Kentaý, Arys qalalary men Báıdibek, Sozaq, Saryaǵash aýdandarynda arnaıy bolyp, turǵyndardyń aryz-shaǵymy negizinde jańadan tóselgen avtokólik joldarǵa saraptama júrgizdi.

Agenttiktiń oblys boıynsha departamenti basshysynyń birinshi orynbasary Mıras Qarǵabaıdyń aıtýynsha, tekserý barysynda 61 buzýshylyq derekteri anyqtalǵan.

«Atap aıtqanda, asfalt-beton jamylǵysynda qalyńdyqtyń sáıkes kelmeýi, jol tóseminde shógindilerdiń, yǵysý men synyqtyń bolýy, tegis emestigi, jol jıekteriniń buzylýy men shópterdiń shıyrshyqtala ósip shyqqany tirkeldi. Sondaı-aq, alynǵan 67 synamanyń 47-si bekitilgen talapqa sáıkes kelmeıtindigi anyqtalyp, aqaýlardy joıý boıynsha jergilikti atqarýshy organdarǵa tapsyrys berýshi 6 hat jiberdi. Buǵan qosa, «Sapaly jol – adaldyq alańy» jobasy aıasynda jyl basynan beri oblystyq mańyzy bar tasjoldarda aýyr júk kólikteriniń ishki tártibine reıd júrgizildi. Tekserý kezinde shamadan tys júk tıegen 70 aýyr júk kóligine jalpy quny 1 377 370 teńge kóleminde aıyppul salyndy»,- deıdi Mıras Qarǵabaı.

Aıta keteıik, «Ulttyq jol aktıvteri sapasy ortalyǵy» RMK Túrkistan oblysy boıynsha fılıaly men «Túrkistan - adaldyq alańy» jobalyq keńsesiniń menedjerleri birlese otyryp, aıyna eki ret oblysqa qarasty barlyq avtokólik joldaryna turaqty negizde monıtorıng júrgizip otyrady.

Osy oraıda óńir turǵyndary ózi turatyn qala-aýdandaǵy jol sapasynan kemshilikter men aqaýlardy baıqaǵan jaǵdaıda + 7 747 263 83 63 nómirine habarlasyp, foto-beınematerıaldaryn qosa jiberýge bolady.

Azamattar tipti monıtorıng jumysyna qatysa alady.