Túrkistan oblysynda jol salasyn damytýǵa 20 mlrd teńgege jýyq qarjy qaraldy
TÚRKІSTAN. QazAqparat – Túrkistan oblysynda 1,5 myń shaqyrymnan astam jol men kóshelerde qurylys-jóndeý jumystary júrgizilip, paıdalanýǵa berildi. Aýqymdy jumystarǵa bıyl da 20 mlrd teńgege jýyq qarjy qaralyp, jalǵasyn tabatyn bolady, dep habarlaıdy QazAqparat tilshisi.
Oblystyq ákimdiktiń málimetinshe, aǵymdaǵy jyly jergilikti mańyzy bar avtomobıl joldarynyń jaqsy jáne qanaǵatty jaǵdaıdaǵy úlesin 81,4%-ǵa arttyrý kózdelip otyr.
Oblys ákimi Ómirzaq Shókeevtiń tóraǵalyǵymen ótken jıynda osy baǵytta atqarylyp jatqan jumystardyń barysy baıandaldy. Búginde óńirde avtomobıl joldary men eldimeken kósheleriniń uzyndyǵy 17 637 shaqyrymdy quraıdy.
Ótken jyly avtomobıl joldaryn damytýǵa bıýdjetten 54,8 mlrd teńge bólingen. Oblys joldary jaıly baıandaǵan jaýapty basqarma basshysy Rolan Ibragımovtyń aıtýynsha, bıyl jol salasyn damytýǵa bıýdjetten 19,9 mlrd teńge qaralýda. 156 nysan nemese 538 shaqyrym joldar men eldi meken kósheleri qamtylady dep josparlanǵan.
Bıyl Túrkistan qalasyndaǵy áýejaıǵa baratyn avtomobıl jolyn, Túrkistan-Kentaý, Túrkistan-Baltakól, Kentaý-Aşysaı, Shymkent-Aqsýkent, Aqsýkent-Qaramurt, Shymkent-Saıram, Sharaphana-Jańabazar baǵyttaryndaǵy joldar paıdalanýǵa berilmek. Budan ózge, Maqtaaral, Jetisaı, Keles aýdandaryndaǵy oblystyq mańyzy bar avtomobıl joldaryn jańartý jumystaryn aıaqtaý kózdelýde.
Sáýir aıynda Túrkistan qalasyndaǵy jańadan salynǵan áýejaıǵa baratyn 16,3 shaqyrym jol paıdalanýǵa beriledi. Túrkistan-Kentaý baǵytyndaǵy uzyndyǵy 19 shaqyrym jolǵa ortasha jóndeý jumystary júrgizilýde. Sonyń ishinde aıaqjol, velojol, jaryqtandyrý qarastyrylǵan. Budan basqa Túrkistan qalasyna Kentaý qalasynan kireberis 26,6 shaqyrym joldy jóndeý jumystary bastalǵan.
Túrkistan-Baltakól, Túrkistan-Qarnaq-Kentaý, Kentaý-Aşysaı baǵyttaryndaǵy 113,2 shaqyrym avtomobıl joldary kúrdeli jáne ortasha jóndeýden ótkizilýde. Bul jumystar jyl sońyna deıin tolyq aıaqtalady dep josparlanyp otyr.
Shardara-Temirlan baǵytyndaǵy jalpy uzyndyǵy 162,6 shaqyrym joldarǵa kúrdeli jáne ortasha jóndeýden ótkizilýde. Shymkent-Aqsýkent, Aqsýkent-Qaramurt, Shymkent-Kóksáıek baǵyttaryndaǵy 50 shaqyrymnan asatyn kúre joldar jóndeýden ótkizilýde. Jyl sońyna deıin jumystar tolyq aıaqtalyp, halyq ıgiligine berilmek.
Al, Maqtaaral, Jetisaı, Keles aýdandary aýmaǵynda uzyndyǵy 50 shaqyrymǵa jýyq joldar jóndelýde. Odan bólek, osy aýdanda jalpy uzyndyǵy 184,6 shaqyrymdy quraıtyn 11 oblystyq mańyzy bar avtomobıl joldary jańartylyp jatyr.
Bul joldar qyrkúıek aıynda paıdalanýǵa berilmek.
