Túrkistan oblysynda jol qurylysyna salǵyrt qaraǵandar jazalanyp jatyr
Ulttyq sapa ortalyǵynyń ınjeneri Bekjan Bóriqulovtyń aıtýynsha, ótken jyly oblystyq sáýlet-qurylys baqylaý basqarmasyna jol salýdaǵy kemshilikter boıynsha 11 hat joldanǵan.
Nátıjesinde bir tehnıkalyq qadaǵalaýshyǵa 500 myń teńge aıyp salynyp, jarty jylǵa lıtsenzııasynan aıryldy.
Sondaı-aq, bir merdiger 2 mln 200 myń teńge aıyppul tóleýge májbúr boldy. Al, qalǵan úsh mekeme kemshilikterin túzep, anyqtalǵan aqaýlardy joıǵan.
«QR Indýstrııa jáne ınfraqurylymdyq damý mınıstrligi jańa zań jobasyn ázirledi. Qazir ol Májiliste qaralyp jatyr. Qujat boıynsha endi Ulttyq sapa ortalyǵynyń qyzmeti men quzyreti keńeıedi. Atalǵan mekeme endi eldimekenderdiń joldaryna deıin mindetti saraptamadan ótkizedi. Osylaısha tehnıkalyq qadaǵalaý men jobalaý uıymdarynyń jaýapkershilikten sytylyp ketýine jol berilmeıdi. Buǵan deıin kepildik kezeńindegi joldardan qansha aqaý anyqtalsa da, bul eki uıym ortaq jaýapkershilikke tartylmaıtyn», - deıdi Bekjan Bóriqulov.
Aıta keteıik, Qazaqstanda jalpy qoldanystaǵy avtomobıl joldarynyń uzyndyǵy - 157 myń shaqyrym.
Onyń ishinde 25 myńy respýblıkalyq mańyzy bar, 71 myńy jergilikti mańyzy bar jol. Al, eldimeken kósheleriniń jalpy uzyndyǵy - 61 myń shaqyrym.
