Túrkistan oblysynda jol qozǵalysy dron arqyly baqylanady
Budan bylaı profılaktıkalyq-reıdtik shara kezinde jol qozǵalysy erejelerin buzýshylardy baqylaý úshin dron qoldanylady. Áýege ushyrylatyn bul qurylǵy zań buzýshylyqtardy túsirip, sodan keıin beınejazba polıtseıdiń planshetine jiberiledi.
Budan ári tártip saqshylary jolda quqyq buzýshylardy toqtatyp, ákimshilik hattamalardy rásimdeıdi.
«Kentaý qalasyna kire beris aımaqta júrgizilgen reıd barysynda kólik quraldaryn paıdalaný erejelerin buzǵan, qarsy qozǵalys jolaǵyna shyqqan jáne avtokólikti qujatsyz basqarǵany úshin birneshe kólik ıesine shara kórildi. Tyń tájirıbe oń nátıjesin kórsetip otyr. Aldaǵy ýaqytta reıd avarııalyq-qaýipti ýchaskelerde jalǵasatyn bolady» - deıdi Túrkistan oblysy polıtsııa departamenti ákimshilik polıtsııa basqarmasynyń bastyǵy, polıtsııa polkovnıgi Almashan Tastanbekov.
Aıta keteıik, jyl basynan beri Túrkistan oblysynyń joldarynda 450-den astam jol-kólik oqıǵasy tirkelgen.
Onyń ishinde oblystyq mańyzy bar joldardaǵy jol kólik oqıǵalary 55,4 paıyzǵa artqan.
