Túrkistan oblysynda jol boıynda júrgizýshilerdiń qan qysymy ólshendi
Túrkistan oblysynda 2 kún qatarynan respýblıkalyq «Jolda qabyldaý» aktsııasy ótti. Onda tártip saqshylary men jedel járdem qyzmetkerler jol boıynda júrgizýshilerdiń qan qysymyn ólshep, polıtsııaǵa qatysty týyndaǵan barlyq suraqtarǵa jaýap berdi.
Sonymen qatar, jol erejesin qatań saqtaý týraly arnaıy eskertpeler men zań baptary jazylǵan jadynamalar taratty.
Polıtseılerdiń taldaýy boıynsha jyl basynan bastap 6 aı ishinde oblysta 200-den astam jol kólik oqıǵasy tirkelip, 90-ǵa jýyq adam qaza tapqan.
«Jolda qabyldaý» aktsııasy oblys ortalyǵy Túrkistan qalasyndaǵy «Kerýen saraı» kesheninde, mamandandyrylǵan halyqqa qyzmet kórsetý ortalyǵynda jáne Saýran shep beketinde uıymdastyryldy. Al aýdandyq polıtsııa qurylymdary adamdar kóp shoǵyrlanǵan oryn retinde óz aýmaqtaryndaǵy Halyqqa qyzmet kórsetý ortalyqtarynda ótkizdi. Eki kúnde polıtseıler 300-ge jýyq adamdy qabyldap, quqyqtyq saýattylyǵyn arttyrý maqsatynda kómek kórsetti»-delingen Túrkistan oblysy polıtsııa departamentiniń baspasóz qyzmeti taratqan aqparatta.
