Túrkistan oblysynda jol apatynan jaraqat alǵandardyń ekeýi jansaqtaý bóliminde
TÚRKІSTAN. QazAqparat - Túrkistan oblysy, Saıram aýdanynda bolǵan jol apatynan jaraqat alǵan jolaýshylardyń jaǵdaılary týraly dárigerler málimet berdi. Aýdandyq aýrýhanaǵa túsken naýqastardyń ekeýi jansaqtaý bólimine jatqyzyldy, dep habarlaıdy QazAqparat tilshisi.
Oblystyq Qoǵamdyq densaýlyq basqarmasy baspasóz qyzmetiniń málimetinshe, jaraqat alǵan jeti adamnyń beseýi aýdandyq aýrýhanaǵa jetkizilgen.
«Aýrýhanaǵa túsken naýqastardyń barlygy - TOYOTA ALPARD avtokóliginiń jolaýshylary. Olardyń ekeýi dereý jansaqtaý bólimine jatqyzylǵan. Taǵy eki naýqas jaraqat bóliminde em qabyldaýda. Al, bir naýqastyń jaǵdaıy qanaǵattanarlyq bolǵan soń, ambýlatorııalyq em qabyldaýǵa joldandy. Jansaqtaý bólimindegi eki adam búgin bólimshege aýystyrylǵan. Jaǵdaılary birqalypty», delingen basqarmanyń berge habarlamasynda.
Aıta keteıik, jol apaty keshe keshkisin saǵat 21:30 shamasynda Batys Eýropa-Batys Qytaı tas jolynyń 4-shaqyrymynda bolǵan edi. TOYOTA ALPARD markaly avtokóliginiń júrgizýshisi Almaty qalasynan Qyzylorda baǵytyna qaraı kele jatyp, aldynda ketip bara jatqan HOWO markaly júk kóliginiń artqy bóligine soqtyǵysqan. Nátıjesinde jeti adam jaraqat alyp, taǵy bir jolaýshy jedel járdem kóliginde qaıtys bolǵan. Qazirgi tańda Saıram APB polıtseılerimen atalǵan jaıt QR QK-niń 345-baby 3-bóligimen «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha tirkeýge alyndy. Avtokólikter aıypturaqqa qoıyldy. Búginde oqıǵanyń tolyq mán-jaıyn anyqtaý sharalary júrgizilýde.
