Túrkistan oblysynda jol apatynan eki júrgizýshi kóz jumdy
TÚRKІSTAN. QazAqparat - Demalys kúnderi Túrkistan oblysynyń aýmaǵynda eki jol apaty boldy, dep habarlaıdy QazAqparat oblystyq polıtsııa departamentine silteme jasap.
19 jeltoqsan kúni saǵat 10:35 shamasynda kezekshi bólimge Ordabasy aýdanynda Shymkent-Samara tasjolynyń 125-shaqyrymynda jol-kólik oqıǵasy bolǵany týraly habarlama kelip tústi.
Júk kóligi aýdarylyp, saldarynan «fýranyń» júrgizýshisi alǵan jaraqatynan kóz jumdy. Oqıǵa ornyna polıtsııa men TJD qyzmetkerleri keldi.
Sol kúni Eski Iqan aýyly janynda Shymkent-Túrkistan tasjoly boıynda «DAF» júk kóliginiń júrgizýshisi kóktaıǵaq saldarynan rýldi basqara almaı, avtokólik aýdarylǵan.
Atalmysh jol-kólik oqıǵasy saldarynan bul júk kóliginiń júrgizýshisi de oqıǵa ornynda alǵan dene jaraqatynan kóz jumdy.
Atalǵan jaıttar QR QK 345-baby boıynsha tirkeldi. Tergeýshiler jol-kólik oqıǵalarynyń mán-jaıyn anyqtap jatyr.
Óz kezeginde Túrkistan oblysynyń polıtseıleri avtokólik ıelerine joldarda, ásirese aýa-raıy qolaısyz kezde abaı bolýdy usynady.
Júrgizýshiler jol erejelerin qatań saqtaýǵa, jyldamdyqty asyrmaýǵa, qarama-qarsy qozǵalys jolaǵyna shyqpaýǵa, qashyqtyqty saqtaýǵa jáne kóktaıǵaqtaǵy trassalarda muqııat bolýǵa tıis.
«Sizdiń ómirińiz ǵana emes, sonymen qatar jolaýshylar men jol qozǵalysynyń basqa da qatysýshylarynyń qaýipsizdigi jol erejesin saqtaýǵa tikeleı baılanysty. Esińizde bolsyn, jol qatelikti keshirmeıdi. Sonymen qatar jyldamdyqty asyrmaı, jol erejesin qatań saqtańyzdar» dep eskertedi polıtsııa.
