Túrkistan oblysynda jol apatynan 5 adam qaza tapty
TÚRKІSTAN. QazAqparat - Túrkistan oblysynda jol apatynan 5 adam qaza tapty. Jantúrshigerlik jol kólik oqıǵasy búgin Shardara -Abaı tas jolynda bolǵan, dep habarlaıdy QazAqparat tilshisi.
Oblystyq polıtsııa departamentiniń málimetinshe, túngi saǵat birler shamasynda «MAZ» júk kóligi jol boıyndaǵy jylqyny soǵyp ketken. Artynsha joldyń qarsy betine shyǵyp ketip, «Leksýs» markaly kólikpen soqtyǵysqan. Jol apaty saldarynan jeńil kóliktiń júrgizýshisi men tórt jolaýshy oqıǵa ornynda jan tásilim etti. Qaza tapqan júrgizýshiniń Almaty qalasynyń turǵyny ekeni anyqtaldy. Jolaýshylardyń biri Shardara aýdanynyń turǵyny, qalǵan úsh adam Ózbekstan Respýblıkasynyń azamattary bolyp shyqty. Taǵy bir ózbekstandyq jolaýshy túrli dene jaraqatymen aýdandyq aýrýhananyń jansaqtaý bólimine jatqyzyldy.
«Qazir osy oqıǵa boıynsha Qylmystyq kodekstiń 345 baby «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha sotqa deıingi tergeý amaldary júrgizilýde. Saraptamalar taǵaıyndalyp, júk kóliginiń júrgizýshisi (Qyzylorda oblysynyń turǵyny) qamaýǵa alyndy. Polıtseıler jylqynyń ıesin izdestirip jatyr», delingen habarlamada.
