Túrkistan oblysynda jol apatynan 3 adam qaza tapty
TÚRKІSTAN. QazAqparat - Túrkistan oblysynda bolǵan jol apatynan úsh adam qaza tapty. Taǵy bir júrgizýshi túrli deńgeıde dene jaraqatymen aýrýhanaǵa jetkizildi, dep habarlaıdy QazAqparat tilshisi.
Qaıǵyly jaǵdaı 22 qarasha kúni kúndiz Saıram aýdanynyń aýmaǵynda bolǵan. Oblystyq Polıtsııa departamentiniń málimetinshe, jol kólik oqıǵasyna «VAZ 2106» avtokóliginiń júrgizýshisi kináli bolǵan.
«VAZ 2106» avtokóliginiń júrgizýshisi jol erejesin óreskel buzyp, qarama-qarsy baǵytqa shyǵyp ketken. Sóıtip «Aýdı» avtokóligimen soqtyǵysqan. Nátıjesinde, «Jıgýlı» avtokóliginiń júrgizýshisi men onyń eki birdeı jolaýshysy oqıǵa ornynda mert boldy. «Aýdı» markaly avtokóliginiń júrgizýshisi túrli dene jaraqattarymen aýrýhanaǵa jetkizildi» delingen polıtsııa habarlamasynda.
Qazirgi tańda Túrkistan oblysy PD-niń anyqtaýshylary osy oqıǵa boıynsha QR QK-niń 345 «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha sotqa deıingi tergeý jumystaryn júrgizýde. Birneshe saraptamalar taǵaıyndalǵan.
