Túrkistan oblysynda joǵary tehnologııaly jylyjaı kesheni salynady

ASTANA. QazAqparat - Túrkistan oblysy Kentaý qalasyna qarasty Qotyrbulaq eldimekeninde 2020 jyly quny 500 mln dollarǵa joǵary tehnologııaly óndiristik jylyjaı kesheni iske qosylady, dep habarlaıdy QazAqparat oblys ákiminiń baspasóz qyzmetine silteme jasap.

Jylyjaıǵa 245 gektar jer telimi bólinip otyr. Onyń 220 gektary jylyjaı kesheni bolsa, al 25 gektarǵa daıyn ónimdi saqtaıtyn zamanaýı nysan salynbaq. Jobany tolyǵymen túrkııalyq Dal Holding Investment Co., Ltd kompanııasy júzege asyrady. Bıznes-jobaǵa sáıkes, jylyjaı kesheninde qııar, qyzanaq pen bolgar buryshy ósiriledi.

Aıta keteıik, bıyl jylyjaıdyń qorshaý jumystary júrgizilip otyr. 2020 jyly nysan qurylysy bastalady.

Joba iske qosylǵan soń jylyjaıdan 20 myń tonna ónim alý kózdeledi. Al, tolyq kúshine engen soń ónim kólemin 40-60 tonnaǵa deıin ulǵaıtý josparlanǵan. Zamanaýı jylyjaı kesheninde 3 myń adam jumyspen qamtylmaq.

Eske sala ketsek, Ankarada ótken bıznes forýmda Túrkııanyń kompanııalary men Túrkistan oblysy ákimdigi arasynda yntymaqtastyq jóninde memorandým jasaldy. Osy kelisimnen keıin Túrkistan qalasyna Dal Holding Investment CO kompanııasynyń Qazaqstan Respýblıkasy boıynsha birinshi basshysy Demırdjan Kýse bastaǵan ókilderi keldi.

Investorlardy qabyldaǵan oblys ákimi Janseıit Túımebaev kompanııa basshylarynyń Túrkistandy damytý baǵytyndaǵy usynystaryna qoldaý kórsetýge daıyn ekenin aıtty.

Demırdjan Kýse qazirdiń ózinde naqty jobamen kelgenin, oblyspen tanysý barysynda ózge de jobalardy qarjylandyrýǵa ázir ekenin málimdedi. Sonyń biri Batys Eýropa-Batys Qytaı» halyqaralyq kólik dálizine 25 shaqyrym jerdegi ındýstrıaldy aımaqta salynatyn jylyjaı kesheni bolatyn.