Túrkistan oblysynda joǵalyp ketken oqýshy tabyldy
TÚRKІSTAN. QazAqparat - Túrkistan oblysy, Shardara aýdanynda 4-shi synyp oqýshysy iz túzsiz joǵalyp ketken. Ózdiginen taba almaǵan ata-anasy aýdandyq polıtsııaǵa kómek surap barǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, balanyń anasy túngi ekiler shamasynda habarlasqan. Óziniń 11 jastaǵy ulynyń belgisiz baǵytqa ketip, qaıta oralmaǵanyn jetkizgen. Bul habarlamadan keıin shardaralyq polıtseıler birden joǵalǵan balany izdep tabý úshin barlyq kúshti jumyldyrǵan. Polıtsııa qyzmetkerleriniń jedel izdestirýiniń arqasynda 4-shi synyp oqýshysy bir táýlik ishinde tabyldy. Mektep oqýshysy dosynyń úıinde uıyqtap qalǵan bolyp shyqty.
«Qazirgi tańda 11 jastaǵy bala úıine qaıtaryldy. Ulymen aman-esen qaýyshqan anasy balasyn izdestirýge kómektesken polıtsııa qyzmetkerlerine izgi yqylasyn bildirip, alǵys aıtty» delingen habarlamada.
