Túrkistan oblysynda joǵalǵan jigittiń 75 mıllıon teńge qaryzy bolǵan
TÚRKІSTAN. QazAqparat - Túrkistan oblysynda joǵalǵan jigittiń 75 mıllıon teńge qaryzy bolǵan. Ol tanystarynan alǵan aqshany qumar oıynǵa jumsap otyrypty, dep habarlaıdy QazAqparat tilshisi.
Lenger qalasynyń turǵyny jasy 30-ǵa jýyqtaǵan ulynyń 4 táýlikten beri iz-túzsiz ketkenin aıtyp, polıtseılerge habarlasqan.
Tólebı APB qyzmetkerleri qala kóshelerin tekserip, fotosýretin kórsetý arqyly turǵyndar arasynda surastyrý jumystaryn júrgizdi. Respýblıka kóleminde tártip saqshylaryna baǵyttamalar joldanyp, joǵalǵan jigittiń aıryqsha belgilerin habarlaǵan. Jaqyndary men týystary, tanystary men barýy múmkin jerler muqııat tekserilgen. Іzdeý jumystaryna Jergilikti polıtsııa qyzmetiniń ýchaskelik polıtsııa, jedel ýákilder men patrýldik polıtseıler jumyldyryldy. Nátıjesinde tártip saqshylary joǵalǵan jigitti Almaty qalasynda júrgen jerinen tapty.
«Belgili bolǵandaı, azamat óziniń tanystarynan 75 mıllıon teńge qaryzǵa aqsha alyp, ony qumar oıynǵa jumsap jibergen. Ol óz sózinde qaryzǵa alǵan aqshasyn qaıtara almaǵandyqtan, Almaty qalasyna qashyp ketýge májbúr bolǵanyn jetkizdi» - delingen Túrkistan oblysy polıtsııa departamenti taratqan habarlamada.
Qazirgi tańda joǵalyp ketken orta jastaǵy azamat aman esen otbasyna oraldy. Ulymen qaýyshqan anasy, balasyn izdestirýde kásibılikterin kórsetip, taýyp bergen polıtsııa qyzmetkerlerine rızashylyǵyn bildirdi.
