Túrkistan oblysynda joǵalǵan 3 jasar qyz bala tabyldy
TÚRKІSTAN. QazAqparat - Túrkistan oblysynda ýchaskelik polıtsııa ınspektorlary 3 jasar qyzdy taýyp, anasyna tabystady, dep habarlaıdy QazAqparat.
Jetisaı qalasyna qarasty №2 ýchaskelik tirek pýnktine bekitilgen ýchaskelik polıtsııa ınspektorlary joǵalǵan qyzyn taýyp berip, bir otbasyn qýantty.
Naqtyraq aıtsaq, polıtsııa maıorlary Erken Meıirjabaev pen Abzal Aqshoraev turǵyndar arasynda tıisti profılaktıkalyq jumys júrgizip júrgende saǵat 17:00 shamasynda A.Baıtursynov kóshesi boıynda kishkentaı qyzdyń jylap, úıin tappaı adasyp júrgenin baıqap, janyna birden jetedi.
Shamamen jasy 3-4-tegi búldirshinnen esimin, ata-anasyn, mekenjaıyn suraı bastaıdy. Alaıda tili tolyq shyqpaǵan qyz, eshqandaı naqty málimet bere almaıdy.
Sodan polıtseıler kishkentaıdy jubatyp, ýchaskelik polıtsııa pýnktine jetkizip, as-sýyn beredi.
Odan ary izdestirý jumystaryn júrgizip, sol aýmaqtaǵy turǵyndar arasynda surastyrý jumysyn júrgizdi.
Úı-úıdi qarap, qyzdyń ata-anasyn izdedi. Jedel júrgizilgen izdestirý, surastyrý jumystary nátıjesinde polıtseıler 1 saǵat ishinde qyzdyń ata-anasyn tabady.
Tekserý barysynda anyqtalǵandaı, 3 jasar qyz dalada oınap júrip, aýlasynan shyǵyp, alystap ketken.
Al úıinde odan kishkentaı shaqalaǵymen otyrǵan anasy baıqamaı qalǵan.
Óz kezeginde 3 jasar qyzdyń anasy qyzyn taýyp bergen polıtseılerge shynaıy rızashylyǵyn jetkizdi.
«Qyzymdy aıaqasty joǵaltyp aldym. Ózim izdep shyqqan edim, osy aralyqta polıtseıler qyzymdy aman-esen taýyp, qaýipsizdigin qamtamasyz etkenine rızamyn» dep atap ótti ol.
