Túrkistan oblysynda joǵalǵan 2 jasóspirim qyz tabyldy

TÚRKІSTAN. QazAqparat - Túrkistan oblysynyń polıtseıleri joǵalǵan 2 jasóspirim qyzdy izdep tapty, dep habarlaıdy QazAqparat Polisia.kz-ke ilteme jasap.

Túrkistan qalalyq polıtsııa basqarmasyna eki áıel habarlasyp, kómek suraǵan. Kórshi turatyn jalǵyzbasty analardyń aıtýynsha, bireýiniń 10-synyp, ekinshisiniń 9-synyp oqıtyn qyzdary 29 qańtar kúni úılerinen shyǵyp ketip, sodan qaıta oralmaǵan.

Joǵalǵan jasóspirim qyzdardy tez arada tabý maqsatynda Túrkistan qalasynyń tájirıbeli polıtseıleri izdestirý jumystaryn júrgizdi. Іz-tússiz ketken eki kámelet jasyna tolmaǵan qyzdardyń sýretteri jolaýshy tasymaldaýshylarǵa kórsetilip, Túrkistan qalasynda ornalasqan oıyn-saýyq oryndary, qonaq úıler tekserildi.

Sondaı-aq Túrkistan oblysy PD-ǵa qarasty barlyq qala, aýdandyq polıtsııa basqarma, bólimderimen, basqa da oblystyq polıtsııa departamentteriniń krımınaldyq polıtsııa basqarmalaryna baǵytnamalar joldandy.

Túrkistandyq tártip saqshylarynyń 3 táýlik boıy úzilissiz júrgizgen izdestirý sharalary oń nátıje berip, jasóspirim qyzdar tabyldy. Olar oblys ortalyǵyndaǵy 1-móltekaýdandaǵy jaldamaly páterden tabyldy. Osylaısha din-aman tabylǵan oqýshy qyzdar, otbasylaryna qaıtaryldy.

Anyqtalǵandaı, eki jasóspirim ózderi turý úshin páter jaldaǵan, sodan 3 kún boıy sonda túnegen. Qazirgi tańda oqıǵanyń mán-jaıy anyqtalyp jatyr. Qyzdardyń analaryna profılaktıkalyq túsindirme jumystary júrgizildi. Eki qyzdyń anasy polıtsııa qyzmetkerleriniń jumysyna rıza bolyp, alǵystaryn bildirdi.

Foto:polisia.kz