Túrkistan oblysynda jıhaz tsehy janyp ketti
TÚRKІSTAN. QazAqparat – Túrkistan oblysynyń Shornaq aýylynda jıhaz tsehy janyp ketti. Qatty jeldiń saldarynan órtti sóndirý qıyndyq týǵyzdy, dep habarlaıdy QazAqparat tilshisi.
Oblystyq Tótenshe jaǵdaılar departamentiniń málimetinshe, 16 maýsym kúni saǵat 14.40-ta Túrkistan qalasyndaǵy №1 mamandandyrylǵan órt sóndirý bólimine Qosmezgil kentinde ornalasqan «TAK mebel» jıhaz tsehy janyp jatqany týraly habarlama túsken.
Órtti sóndirýge Tótenshe jaǵdaılar departamentinen 87 maman men 21 tehnıka, Túrkistan oblysynyń Polıtsııa departamentinen 80 qyzmetker men 12 tehnıka, «Apattar medıtsınasy ortalyǵynyń» 3 qyzmetkeri men 1 tehnıkasy jumyldyrylǵan. Oqıǵa ornyna jedel jetken birinshi bólimshe barlaý jumystaryn júrgizip, tilsiz jaýdy aýyzdyqtaǵan.
«Jalyn sharpyǵan aýmaq 2520 sharshy metrdi qurady. Sondaı-aq 1 myń tekshe metr aǵash janyp ketti. Órttiń taralýy 16 saǵat 53 mınýtta toqtatylyp, 21 saǵat 08 mınýtta tolyǵymen sóndirildi. Qazirgi tańda oqıǵa sebebi men shyǵyny anyqtalýda», - delingen habarlamada.
Qaza bolǵandar men zardap shekkender joq.
