Túrkistan oblysynda jergilikti turǵyndardan 63 myńnan astam ótinish túsken
TÚRKІSTAN. QazAqparat - Túrkistan oblysynda memlekettik mekemelerdiń halyqqa kórsetiletin qyzmet sapasynyń artýy nátıjesinde jergilikti turǵyndardan 63 myńnan astam ótinish túsken. El aldyndaǵy eseptik kezdesýin bastaǵan oblys ákimi Ómirzaq Shókeev ótken jyldy qorytyndylap, jyl kóshinde atqarylǵan jumystar týraly aıtty, dep habarlaıdy QazAqparat tilshisi.
Aımaq basshysynyń aıtýynsha, ótken jylmen salystyrǵanda azamattardan túsetin ótinishter sany 26%-ǵa azaıǵan.
Qol jetken jetistikter men aldaǵy aıqyn mindetterdi keńinen baıandaǵan ákim aımaq damýynyń negizgi baǵyttaryna da toqtaldy.
Pandemııaǵa baılanysty bıyl eseptik kezdesý onlaın formatta, karantın talaptaryna saı uıymdastyryldy.
«Óńirde «Halyq únine qulaq asatyn memleket» tujyrymdamasyn iske asyrý jumystary júıeli túrde jalǵasýda. Ótken jyldyń barysynda ózim jáne orynbasarlarym, basqarma basshylary men aýdan, qala ákimderi, oblys turǵyndarynyń ótinishteri boıynsha 3940 azamattardy jeke qabyldap, nátıjesimen, eldiń qajetti ekonomıkalyq áleýmettik máselelerin talqylap, sheshý joldaryn qarastyrdyq»,-dedi Ó. Shókeev.
Óńirde sondaı-aq, memlekettik mekemelerdiń halyqqa kórsetiletin qyzmet sapasyn arttyrý men turǵyndardyń ótinishterin bir jerden sheshý baǵytynda barlyq aýdan, qala ortalyqtarynda «Front-ofıs» keńseleri ashylǵan.
Basqarmalar úıiniń ǵımaratynda oblystyq «Ashyq ákimdik» keńsesi óz jumysyn bastap, keńsede 21 basqarmanyń jáne tikeleı memlekettik qyzmet kórsetetin 16 basqarmanyń jaýapty qyzmetkerleri jumys jasaıdy.
Al, «Eńbek» memlekettik baǵdarlamasyn iske asyrýǵa byltyr 24,4 mlrd teńge qaralǵan. Onyń aıasynda 88 myńnan astam adam jumyspen qamtýdyń belsendi sharalaryna qatysqan.
Búginde oblystaǵy 100 myńnan astam kópbalaly otbasy aı saıyn járdemaqy alady.
2020 jyly josparlanǵan 50 myńdaı kópbalaly otbasynyń 39 myńy ataýly áleýmettik kómekke júginip, olarǵa 14 mlrd. teńgege kómek taǵaıyndalǵan.
Bul kórsetkish 2019 jylmen salystyrǵanda 64,3%-ǵa kemigen.
Sondaı-aq, tótenshe jaǵdaı kezinde áleýmettik osal toptarǵa áleýmettik qoldaý kórsetý úshin jumysynan aırylý saldarynan tabysy tómendegen 880 myńnan astam azamatqa jalpy sommasy 37,3 mlrd teńgege 42 500 teńge mólsherinde áleýmettik tólemder usynylǵan.
170 myńǵa jýyq 6-18 jas aralyǵyndaǵy AÁK alýshy balalarǵa, múgedekter men jumyssyz azamatqa 3,7 mlrd teńgege 5 567 teńge kólemindegi ótemaqy túrinde azyq-túlik-turmystyq paketter berilgen.
