Túrkistan oblysynda jer qoınaýyn zańsyz paıdalanýdyń 30 deregi tirkeldi
TÚRKІSTAN. QazAqparat –Túrkistan oblysynda jyl basynan beri jer qoınaýyn zańsyz paıdalanýdyń 30 deregi tirkelgen. Bul týraly polıtsııa departamenti jergilikti polıtsııa qyzmeti basqarmasynyń aǵa ınspektory, polıtsııa maıory Nurlan Tumabaev málimdedi, dep habarlaıdy QazAqparat tilshisi.
Nurlan Tumabaevtyń aıtýynsha, zańbuzýshylardyń 43 tehnıkasy tıisti sheshim qabyldanǵansha ýaqytsha aıypturaqqa jetkizilgen.
«Alty aı ishinde ońtústik óńirde 43 ekologııalyq qylmys tirkelip, 737 ákimshilik quqyq buzý faktisi anyqtalǵan. Zań buzýshylarǵa 6 722 282 teńge kóleminde aıyppul salynǵan. Óńirdiń tabıǵat qorǵaý polıtsııa ınspektorlary múddeli memlekettik organdarmen birlese otyryp oblys aýmaǵynda ekologııalyq qylmystyń aldyn alý baǵytynda «Brakoner», «Ýyldyryq shashý» jáne «Qyzǵaldaq», «Jer qoınaýy» atty reıd sharalaryn ótkizgen»,- deıdi jergilikti polıtsııa qyzmeti basqarmasynyń aǵa ınspektory.
Aıta keteıik, óńirde 18 tabıǵat qorǵaý polıtsııa ınspektory bar. Inspektorlar jergilikti halyq arasynda tabıǵat qorǵaý zańnamalaryn buzbaý kerektigin aıtyp, buzǵan jaǵdaıda qylmystyq, ákimshilik jaýapkershilikke tartylatynyn túsindiredi.
