Túrkistan oblysynda jeńil kólik traktormen soqtyǵysyp, bir adam kóz jumdy
TÚRKІSTAN. QazAqparat – Búgin «Shymkent-Samara» avtojolynyń 141 shaqyrymynda jol-kólik oqıǵasy boldy. «Hıýndaı-Gretta» markaly jeńil avtokólik aldynda kele jatqan traktorǵa kirip ketken, dep habarlaıdy QazAqparat tilshisi.
Jol-kólik oqıǵasy saldarynan jeńil kóliktiń bir jolaýshysy kóz jumdy. Al, ekinshi zardap shekken adam aýrýhanaǵa jetkizildi. Qazirgi tańda apat ornynda tergeýshiler jumys isteýde.
Oblystyq PD baspasóz qyzmetiniń málimetinshe, atalǵan jol-kólik oqıǵasy boıynsha sotqa deıingi tergeý amaldary bastaldy.
«Jol-kólik oqıǵasy QR QK-niń 345-baby (Kólik quraldaryn júrgizýshi adamdardyń jol qozǵalysy nemese kólik quraldaryn paıdalaný erejelerin buzýy) boıynsha tirkelip, polıtsııa qyzmetkerleri oqıǵanyń tolyq mán-jaıyn anyqtaýda» delingen habarlamada.
