Túrkistan oblysynda jemqorlyq týraly habarlaǵandarǵa 1,5 mln teńge syıaqy berilgen

TÚRKІSTAN. QazAqparat – Túrkistan oblysynda sybaılas jemqorlyq faktisi týraly habarlaǵan 9 tulǵaǵa 1,5 mln teńge kóleminde aqshalaı syıaqy berilgen. Bul týraly búgin Óńirlik kommýnıkatsııalar qyzmetinde ótken brıfıngte QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti basshysynyń birinshi orynbasary Mıras Qarǵabaı málim etti, dep habarlaıdy QazAqparat tilshisi.

Mıras Qarǵabaıdyń aıtýynsha, óńirde 1424 Call ortalyǵyna 73 azamat osy máselege qatysty shaǵym túsirgen. 7 tulǵanyń zańsyz áreketi úshin qylmystyq is qozǵalǵan. Aǵymdaǵy jyldyń 8 aıynda Departamenttiń Tergeý basqaramasynyń qaraýynda 288 qylmystyq is bolsa, onyń 169-y Agenttiktiń Túrkistan oblystyq departamentimen tirkelgen. Sondaı-aq, óndiriste bolǵan isterdiń 184-i aıaqtalyp, onyń 42-si sotqa joldanǵan.

«Jyl basynan beri sotqa 75 usynys joldanyp, onyń 64-i qaraldy. Nátıjesinde 44 laýazymdy tulǵa túrli deńgeıdegi tártiptik jaýapkershilikterge tartylǵan. Sotqa deıingi tergep-tekserýdiń biryńǵaı tizilimine jalpy 133 qylmys tirkelse, onyń 99-y sybaılas jemqorlyq qylmystaryna jatady. Bul kórsetkishke sáıkes ótken jylmen salystyrǵanda qylmys sanynyń óskenin baıqaýǵa bolady», – dedi M.Qarǵabaı.

Aıta keteıik, departament mamandary ótken jyly bıýdjet qarajatyn jymqyrý deregi boıynsha 59 qylmysty anyqtaǵan. Bul qylmystardyń negizinde memleketke keltirilgen zalaldyń jalpy quny 830,7 mln tengeni qurap, onyń 822,9 mln teńgesi memleket esebine qaıtarylǵan.