Túrkistan oblysynda jemqorlyq faktisi týraly habarlaǵan azamattarǵa 1,3 mln teńge syıaqy berilgen

TÚRKІSTAN. QazAqparat – Túrkistan oblysynda jarty jylda sybaılas jemqorlyqqa qatysty 257 qylmystyq is tirkelgen. Bul týraly búgin QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti basshysynyń birinshi orynbasary Mıras Qarǵabaı atqarylǵan jumystardyń qorytyndysy boıynsha ótkizgen brıfıng barysynda málimdedi, dep habarlaıdy QazAqparat tilshisi.

Mıras Qarǵabaıdyń aıtýynsha, Tergeý basqarmanyń óndirisinde bolǵan isterdiń 148-i aıaqtalǵan jáne 62 is sotqa joldanǵan. Árbir aıaqtalǵan ister boıynsha QR QPK-niń 200 babyna sáıkes zańbuzýshylyqtarǵa yqpal etken mán-jaılardy joıý jónindegi usynystar engizilgen. Osy baǵytta 59 usynys joldanyp, onyń 40-y qaralǵan. 25 laýazymdy tulǵa tártiptik jaýapkershilikterge tartylǵan.

«Sybaılas jemqorlyq quqyq buzýshylyq faktisi týraly habarlaǵan nemese sybaılas jemqorlyqqa qarsy is-qımylda ózge de jolmen járdemdesken 7 tulǵaǵa 1,3 mln teńge kóleminde aqshalaı syıaqy berilgen. Agenttiktiń 1424 Call ortalyǵyna Túrkistan óńirinen habarlasqan 73 azamattyń bergen aqparaty arqyly jedel áreket etý amaldary júrgizilip, nátıjesinde 5 tulǵanyń zańsyz áreketi úshin qylmystyq is qozǵalǵan», - dedi departamenti basshysynyń birinshi orynbasary.