Túrkistan oblysynda jemqorlyq faktileri jıi kezdesetin salalarǵa monıtorıng júrgizildi
Brıfıng barysynda Túrkistan oblysy ákiminiń orynbasary Sáken Qalqamanov «Túrkistan – adaldyq alańy» jobalyq keńsesiniń bastamasymen óńirdegi turmystyq jemqorlyqtyń deńgeıin tómendetýge baǵyttalǵan birqatar keleli jobalardyń júzege asyrylyp jatqandyǵyn baıandap ótti. Sybaılastyqtyń aldyn alýda jáne adaldyq ıdeologııasyn dáripteýde jobalyq keńseniń aıryqsha mańyzǵa ıe ekendigin atap ótti.
Baspasóz jıynynda sóz alǵan atalmysh jobalyq keńse jetekshisi Asyl Aldabergen eki jyl buryn ashylǵan «Túrkistan – adaldyq alańy» jobasynyń aıasynda sybaılas jemqorlyq faktileri jıi kezdesetin salalarǵa, sonyń ishinde bilim, densaýlyq, sáýlet, qala qurylysy jáne jer qatynastary, áleýmettik qamsyzdandyrý sekildi salalarǵa monıtorıngtik baqylaý jumystary júrgizilip, nátıjesinde Túrkistan óńirinde qoǵamdyq baqylaýdyń kúsheıtilgenin jetkizdi.
Sondaı-aq, bılik ınstıtýttarynyń ashyqtyǵyn qamtamasyz etý maqsatynda oblys aýmaǵynda «Open space» úlgisinde 57 mekeme jáne 69 front keńse men 4 halyqtyq keńse ashylǵanyn, Jobalyq keńse tarapynan turǵyndarǵa qolaıly qyzmet kórsetýge basymdyq berilip jatqandyǵyn aıtty.
Jobalyq keńse jetekshisiniń málimdeýinshe, jyl basynan beri «Sapaly jol - adaldyq alańy» aıasynda memleket bıýdjeti esebinen Túrkistan, Kentaý, Arys qalalary men Sozaq, Báıdibek jáne Saryaǵash aýdandarynda salynǵan oblystyq jáne jergilikti joldardyń sapasyna zerdeleý jumystary júrgizilip, Departamentpen anyqtalǵan 17 kemshilik boıynsha merdiger mekeme basshylaryna qaıta qalpyna keltirý usynyldy. Nátıjesinde sapasy syn kótermeıtin joldar qaıta salynǵan. Buǵan qosa, el aýmaǵynda karantın rejımi enzilgennen beri Túrkistan oblysynyń azamattaryna «Adal kómek» jobasy aıasynda tájirıbeli zańgerler, Departament basshylary, qala/aýdandardyń jáne aýyldyq okrýterdiń ákimderi onlaın formatta jalpy sany 278 ret tikeleı efır ótkizilip, óńir turǵyndaryna tegin quqyqtyq keńester men aqparattyq konsýltatsııalar, sondaı-aq máselelerdiń jedel sheshilýi boıynsha baǵyt-baǵdar berilgen.
Sonymen qatar, Asyl Berikuly naýryz aıynan beri Jobalyq keńseniń menedjerleri áleýmettik mańyzy bar taýarlar men azyq-túlikterdiń jáne dárihanalardaǵy betperde men antıseptık qorǵanysh quraldarynyń baǵa turaqtylyǵyna monıtorıng júrgizilgenin málim etti. Maýsym-shilde aılarynan beri ár kún saıyn turaqty negizde oblysqa qarasty qala/aýdandarda ornalasqan dárihanalardaǵy dárilik zattardyń shektik baǵada satylýyn jáne shet memleketterden kelgen gýmanıtarlyq kómektiń aýrýhanalarǵa tolyq tasymaldanýy jiti baqylaýǵa alynǵan. Bıylǵy jyldyń shilde aıynda oblysqa qarasty 934 dárihanalarǵa júrgizilgen bir aılyq zerdeleý jumystarynyń nátıjesinde 28 dárihananyń dári-dármek baǵasyn shektik baǵadan asyryp satqandyǵy jáne 2 dárihananyń memlekettik lıtsenzııasyz jumys jasap kelgeni anyqtalyp, shara kórý úshin ýákiletti organdarǵa joldandy.