Túrkistan oblysynda jemqorlyq boıynsha memleketke keltirgen zalaldyń 99,7% óndirilgen
Ótken jyldy qortyndylaǵan májiliste departament basshysy Hakım Kóshqalıev sóz alyp, tergeý salasynda atqarylǵan jumystar men anyqtalǵan jemqorlyq qylmystary boıynsha statıstıkalyq málimetterge toqtaldy.
Hakım Kóshqalıevtiń sózinshe, óńirde sotqa deıingi tergep-tekserý isi boıynsha 114 qylmystyq is tirkelgen. Onyń ishinde 88-i sybaılas jemqorlyq qylmysy bolyp otyr. Sondaı-aq, óndiristegi qylmystyq isterdiń 328 isi boıynsha túpkilikti protsessýaldyq sheshim qabyldanyp, onyń 81 is aıyptaý aktisimen sot qaraýyna joldanǵan.
100-den asa qoǵam ókili qatysqan esep berý jıynynda óndiristegi qylmystyq ister boıynsha memleketke jalpy kólemi 373,6 mln teńge zalal keltirilgendigi men onyń 372,3 mln teńgesi (99,7%-y) el bıýdjetine óndirilgendigi málim boldy.
Departamenttiń júrgizgen taldaý qorytyndysyna sáıkes, anyqtalǵan sybaılas jemqorlyq sanatyna jatatyn qylmystardyń basym bóligi jergilikti atqarýshy mekemeler men ishki ister qyzmetinde oryn alǵandyǵy ashyq atap kórsetildi.
Aıta ketsek, sotqa deıingi tergep-tekserý isi boıynsha oblysta tirkelgen jemqorlyq qylmysynyń sany 2018 jylmen salystyrǵanda, edáýir tómen. Bul sybaılas jemqorlyqtyń aldyn alý baǵytynda júrgizilgen túsindirý sharalary men aqparattyq-aǵartý jumystarynyń júıeli túrde júrgizilgenin kórsetedi. Jıyn sońynda departamenttiń jańa merzimge qurylǵan jumys jospary men kún tártibinde turǵan basty máseleleri atap ótilip, BAQ ókilderi tarapynan qoıylǵan birqatar saýaldarǵa naqty jaýatarp berildi.