Túrkistan oblysynda jelkendi qaıyq sporty qarqyndy damyp keledi
ASTANA. QazAqparat - Túrkistan oblysynyń Shardara aýdanynda jelkendi qaıyq sporty damyp keledi, dep habarlaıdy QazAqparat Habar24.kz saıtyna silteme jasap.
Shardaralyq órender sporttyń bul túrine erekshe yqylasty. Búginde Shardara sý qoımasyndaǵy úıirmede 60 bala jattyǵyp júr. Kók teńizge jany qushtar jastar jelkendi qaıyqty urshyqsha ıiredi. Bilikti bapkerler de balalarǵa bilgenin úıretip, baǵyt-baǵdar berip otyrady.
Mamandardyń aıtýynsha, jelkendi qaıyq sporty Shardara sý qoımasynda 1970 jyldary keń qanat jaıyp, jaqsy damyǵan eken. Biraq keıin jabylyp qalǵan. Endi qaıta qolǵa alynyp otyr.
«Keshe ǵana Qapshaǵaı sý qoımasyna balalarymyz jarysqa ketti. Júldeli orynmen oralady degen oıdamyz. Ótkende balalarymyz jarysqa qatysyp jeńimpaz atandy. Budan keıin Shardarada jelkendi qaıyq sporty odan da jaqsy damıdy dep úmittenemiz»,-deıdi Shardara balalar men jasóspirimder sport mektebiniń dırektory Abaı Satıev.
