Túrkistan oblysynda jeke jáne zańdy tulǵalardan aryz-shaǵym azaıdy
TÚRKІSTAN. QazAqparat – Ótken jyly Túrkistan oblysynyń Ádilet departamenti 1398 jeke jáne zańdy tulǵanyń ótinishi men aryz-shaǵymdaryn qarady. Barlyǵy 2522 memlekettik qyzmet kórsetildi, dep habarlaıdy QazAqparat.
Óńirlik kommýnıkatsııalar qyzmetinde ótken brıfıngte Túrkistan oblysy boıynsha Ádilet departamentiniń basshysy Muhıt Turǵaraev málim etkendeı, 2018 jylmen salystyrǵanda aryz-shaǵymdar 45 paıyzǵa azaıdy.
«Búgingi tańda Túrkistan oblysy boıynsha 179 notarıýs, 131 advokat qyzmet atqarady. Byltyr advokattar 5488 azamatqa tegin zańgerlik kómek kórsetti. Sondaı-aq, ótken jyly departamentke notarıýstardyń is-áreketterine qatysty 16 aryz-shaǵym túsip, onyń ishinde 8-i negizdi dep tabyldy. Jalpy 2019 jyly 9 notarıýstyń lıtsenzııasy ýaqytsha toqtatylyp, 2 notarıýstyń lıtsenzııasy toqtatyldy. Al, advokattardyń is-áreketterine 8 shaǵym túsip, onyń 1-i negizdi dep tanylǵan. Kásipkerlik qyzmetpen aınalysqany úshin 1 advokattyń lıtsenzııasynyń kúshi toqtatyldy», - dedi Muhıt Turǵaraev.
Byltyr oblys boıynsha 9 memlekettik sot oryndaýshy jáne 126 jeke sot oryndaýshy jumys atqarǵan. Atqarý ústindegi óndiristerdiń 101 131-i memleket paıdasyna aqshany óndirip alýǵa qatysty boldy. Onyń ishinde 42 664 óndiris oryndalyp (42 paıyzy), memleket paıdasyna 10 957 643 teńge óndirildi.
