Túrkistan oblysynda jedel járdem jıi keshigedi
Túrkistan oblysy ákimi apparatynyń aptalyq otyrysynda densaýlyq saqtaý salasynyń ózekti máseleleri, jedel medıtsınalyq járdem qyzmetiniń jaı-kúıi talqylandy. Oblys ákimi Darhan Satybaldy densaýlyq saqtaý salasynyń tehnıkalyq bazasyn nyǵaıtýǵa qoldaý kórsetiletinin aıta kele basqarma basshysy men bas dárigerlerge jumysty shıratýdy tapsyrdy.
«Aýdan, qalalardy aralaý barysynda medıtsına salasynda máseleler kóp ekenin ańǵardyq. Keıbir aımaqtarda densaýlyq saqtaý nysandarynyń jaı-kúıi qanaǵattanarlyqsyz jaǵdaıda. Odan bólek, turǵyndar tarapynan da ótinishter men shaǵymdar túsip jatady. Sondaı-aq, 109 biryńǵaı baılanys ortalyǵy arqyly da jedel járdem qyzmetine qatysty turǵyndardyń 25 qońyraýy tirkelgen. Olardyń kóbi jedel járdemniń jıi keshigetini týraly shaǵymdanǵan. Osy saladaǵy atalǵan jáne ózge de problemalardy sheshýge kúsh salǵan jón», - dedi Darhan Satybaldy.
Sondaı-aq, oblys ákimi dárigerlerdiń qoǵammen baılanysyn jaqsartý kerektigin aıtyp, medıtsınalyq nysandardy qural-jabdyqtarmen qamtý isin jandandyrý qajettigin jetkizdi.
Túrkistan oblysy densaýlyq saqtaý basqarmasynyń basshysy Ashan Baıdýálıevtiń aıtýynsha, óńirdegi 2 mıllıonnan astam turǵynǵa 216 brıgadanyń kúshimen jedel járdem qyzmeti kórsetilip keledi. Brıgada tashylyǵy sezilip otyr. Oblystyq jedel medıtsınalyq járdem stantsııasynyń 6 qalalyq beketi, 17 aýdandyq bólimshesi bar. Jedel medıtsınalyq járdem stantsııalary sanıtarlyq avtokólikteriniń sany – 190, medıtsınalyk sanıtarlyq alǵashqy kómek janyndaǵy jedel medıtsınalyq járdem 85 avtokólikpen qamtylǵan. Bıyl 4 aıda byltyrǵy osy kezeńmen salystyrǵanda jedel járdemge qońyraý shalýshylar sany kóbeıgen. Byltyr 4 aıda 210 456 qońyraý qabyldansa, bıyl 224 742 qońyraý túsken.
Jıynda tozyǵy jetken avtokólikterdi jańa avtokóliktermen almastyrý, mamandar, dárigerler tapshylyǵyn joıý, stantsııalardyń tehnıkalyq bazasyn jańartý, 103 baılanys qyzmetin jaqsartý máseleleri saralanyp, tıisti usynystar berildi.
