Túrkistan oblysynda jedel járdem qyzmetindegi reformalar sóz boldy
TÚRKІSTAN. QazAqparat – Túrkistan oblystyq jedel– járdem qyzmetiniń basshylyǵy buqaralyq aqparat quraldarynyń qatysýymen baspasóz máslıhatyn ótkizdi. Sala mamandary óńirdegi jedel járdem qyzmetindegi reformalardy sóz etti, dep habarlaıdy QazAqparat tilshisi.
Túrkistan oblystyq medıtsınalyq jedel járdem stansasynyń bas dárigeri Medet Marhashovtyń aıtýynsha, aǵymdaǵy jyldyń sáýir aıynan bastap óńirdegi beketter men bólimsheler oblystyq jedel medıtsınalyq járdem stantsııasyna ortalyqtandarylǵan bolatyn. Bazasynda biryńǵaı Call-ortalyǵy uıymdastyrylyp, munda halyqtan táýlik boıy shaqyrtýlar qabyldanýda.
«Call-ortalyqta bir aýysymda 15 dıspetcher qońyraý qabyldasa, 7 qyzmetker shaqyrtýdy brıgadalarǵa baǵyttap otyrady. Túsken shaqyrtýlar «KÓMEK» avtomattandyrylǵan basqarý júıesimen óńdeledi. Qońyraý shalǵan ýaqyttan bastap dıspetcher alynǵan málimetti shaqyrý sanatyna baılanysty suryptap, ony jedel medıtsınalyq járdem brıgadasyna tapsyrǵanǵa deıin ýaqyt 5 mınýtty quraıdy. Jedel járdem qyzmetkerleri 4 jedeldik sanat boıynsha kómekke jol tartady», – deıdi Medet Marhashov.
Sala mamandarynyń sózinshe, árbir jelilik jumys tobynda tikeleı Call-ortalyqtan shaqyrtýdy qabyldaý planshetteri (komýnıkator) bar. Barlyq avtokólikter GPS-navıgatorlarymen qamtylǵan. Bul óz kezeginde ár brıgadanyń qaı jerde ekenin onlaın rejımde 24 saǵat boıy baqylaýǵa múmkindik beredi.
«Táýligine ortalyqqa 3500-ge jýyq qońyraý túsedi. Sonymen qatar Call-ortalyqta 2 dáriger táýlik boıy naýqastarǵa jáne jelilik brıgadalarǵa medıtsınalyq keńes beredi. Oblys boıynsha jedel járdem qyzmetiniń basshylyǵy aldaǵy ýaqytta atalǵan qyzmettiń ári qaraı jetildirile túsetindigin baıandady. Qyzmet jyl sońyna deıin qosymsha 20-dan astam jedel járdem kóligimen qamtylatyn bolady. Qazirgi tańda shamamen 50 kóliktiń jetispeýshiligi baıqalady. Jalpy, Túrkistan oblysynyń turǵyndaryna 123 jelilik brıgada (39 dárigerlik, 84 feldsherlik) jáne 70 emhanalardyń medıtsınalyq alǵashqy sanıtarlyq brıgadalary qyzmet kórsetýde», – deıdi Medet Marhashov.
