Túrkistan oblysynda jedel járdem qyzmeti jańǵyrtylady
NUR-SULTAN. QazAqparat - Bıyl 1 sáýirden bastap óńirdegi beketter men bólimsheler Túrkistan oblystyq jedel medıtsınalyq járdem stantsııasyna ortalyqtandarylyp, biryńǵaı Call-ortalyǵy uıymdastyryldy, dep habarlaıdy oblystyq ákimdiktiń baspasóz qyzeti.
Munda halyqtan táýlik boıy shaqyrtýlar qabyldanýda. Call-ortalyqta bir aýysymda 15 dıspetcher qońyraý qabyldasa, 7 qyzmetker shaqyrtýdy brıgadalarǵa baǵyttap otyrady.
Túsken shaqyrtýlardy «KÓMEK» avtomattandyrylǵan basqarý júıesi óńdeıdi. Bul týraly Túrkistan oblysy óńirlik kommýnıkatsııalar qyzmetinde ótken brıfıngte Túrkistan oblystyq jedel medıtsınalyq járdem stantsııasynyń bas dárigeri Medet Meıirhanuly málim etti.
Jalpy, biryńǵaı 103 nómirine qońyraý shalǵanda dıspetcher belgilep jazyp alatyn nárseler: naýqastyń aty-jóni, jasy, jynysy; naýqastyń jaǵdaıy, oqys oqıǵa, apat, jaraqaty týraly tolyq málimet; mekenjaıy men telefon nómiri, sondaı-aq naýqastyń ornalasqan jeri týraly baǵyt-baǵdar. Qońyraý shalǵan ýaqyttan bastap dıspetcher alynǵan málimetti shaqyrý sanatyna baılanysty suryptap, ony jedel medıtsınalyq járdem brıgadasyna tapsyrǵanǵa deıin ýaqyt 5 mınýtty quraıdy.
«QR DM 03.07.2017 jyly shyqqan «Qazaqstan Respýblıkasynda jedel medıtsınalyq kómek kórsetý qaǵıdalaryn bekitý týraly» №450 buıryǵyna sáıkes jedel járdem qyzmetkerleri 4 jedeldik sanat boıynsha kómekke jol tartady. Atap aıtsaq, adam ómirine tóngen tikeleı qaýpine qaraı 1-jedeldilik sanaty boıynsha jedel járdem qyzmeti on mınýtqa deıin jetedi. 2-jedeldik on bes mınýtqa deıin. 3-jedeldilik sanaty – otyz mınýtqa deıin. Al, 4-jedeldilik sanaty boıynsha sozylmaly aýrýynyń asqynýynan týyndaǵan jáne naýqastyń densaýlyǵyna tikeleı qaýip tónbeıtin jaǵdaıda alpys mınýtqa deıingi ýaqytta jetedi. Ár jelilik jumys tobynda tikeleı Call-ortalyqtan shaqyrtýdy qabyldaý planshetteri (komýnıkator) bar. Barlyq avtokólikter GPS-navıgatorlarymen qamtylǵan. Bul óz kezeginde ár brıgadanyń qaı jerde ekenin Onlaın rejımde 24 saǵat boıy baqylaýǵa múmkindik beredi. Táýligine ortalyqqa 3500-ge jýyq qońyraý túsedi. Sonymen qatar Call-ortalyqta 2 dáriger táýlik boıy naýqastarǵa jáne jelilik brıgadalarǵa medıtsınalyq keńes beredi», – dedi M. Meıirhanuly.
Oblys boıynsha jedel járdem qyzmetiniń basshysynyń aıtýynsh, aldaǵy ýaqytta atalǵan qyzmettiń ári qaraı jetildirile túsetin bolady.
Aıta keteıik, jyl sońyna deıin qosymsha 20-dan astam jedel járdem kóligimen qamtylatyn bolady. Qazirgi tańda shamamen 50 kóliktiń jetispeýshiligi baıqalady. Jalpy, Túrkistan oblysynyń turǵyndaryna 123 jelilik brıgada (39 dárigerlik, 84 feldsherlik) jáne 70 emhanalardyń medıtsınalyq alǵashqy sanıtarlyq brıgadalary qyzmet kórsetýde.
