Túrkistan oblysynda jaıylymnan mal urlaǵan eki sheteldik qamaýǵa alyndy
TÚRKІSTAN. QazAqparat- Túrkistan oblysynda jaıylymnan mal urlaǵan eki sheteldik qamaýǵa alyndy, dep habarlaıdy QazAqparat tilshisi.
Oqıǵa Qazyǵurt aýdanynda oryn alǵan. Kúdiktiler jábirlenýshiniń qoıshysymen jaqsy tanys bolǵan. Sodan keshki ýaqytta jınalyp, birge ishimdik ishken. Qasyndaǵy qoıshy uıyqtap qalǵan sátte, jaıylymdaǵy qoılardy «Nıva» markaly avtokólikke tıep, alyp ketken. Urlaǵan bótenniń múlkin satyp, aqshasyn óz qajettilikterine jaratqan.
«Qazyǵurt aýdandyq polıtsııa bólimine Shymkent qalasynyń turǵyny shaǵymdandy. Er adamnyń aıtýynsha, Qazyǵurt aýdanyna qarasty jaıylymdyq jerden onyń árqaısysynyń quny 70 000 teńge turatyn 27 bas qoıyn belgisiz bireýler urlap ketken. Jábirlenýshige kelgen shyǵyn kólemi 2 000 000 teńgege jýyq. Atalǵan jaıtty polıtsııa qyzmetkerleri QR QK-niń 188-1-baby «Mal urlyǵy» boıynsha tirkeýge aldy. Qazir qylmysqa kúdikti retinde sheteldik eki er adam anyqtalyp, ustaldy. Olar Ózbekstan jáne Qyrǵyzstan Respýblıkasynyń azamattary bolyp shyqty», - delingen Túrkistan oblysy polıtsııa departamentiniń baspasóz qyzmeti taratqan aqparatta.
