Túrkistan oblysynda «jasyl» tehnologııalar júıesi engizilmek
Aımaq basshysy qol qoıylyp otyrǵan qujat oblys ortalyǵy Túrkistan qalasynyń ekonomıkalyq áleýetin damytýǵa mol múmkindik beretinin aıtty
«Elbasymyz balamaly energııa kózderin paıdalaný arqyly jasyl ekonomıkany engizýdi únemi aıtyp keledi. Mine, búginde oblys ortalyǵy Túrkistan qalasy osyndaı jańashyldyqqa bet burǵaly otyr. Al, jumystardy Halyqaralyq jasyl tehnologııalar jáne ınvestıtsııalyq jobalar ortalyǵymen birlese otyryp júzege asyramyz», - dedi Janseıit Qanseıituly.
Búgingi kúni ǵylymı jetistikterdiń arqasynda barlyq ekologııalyq máselelerdi is júzinde ekonomıkalyq turǵyda sheshýge bolady. Sondyqtan da «jasyl» tehnologııalar termıni paıda boldy.
Óz kezeginde «Halyqaralyq jasyl tehnologııalar jáne ınvestıtsııalyq jobalar ortalyǵy» kommertsııalyq emes aktsıonerlik qoǵamynyń basshysy Rapıl Joshybaev, ortalyq «jasyl ekonomıka» obektileriniń aqparattyq júıesin qalyptastyrý jónindegi joba tujyrymdamasyn ázirlegenin jetkizdi.
«Bul memlekettik baǵdarlama aıasynda iske asyrylatyn jáne qazaqstandyq kásiporyndardaǵy jasyl tehnologııanyń engizilýin, sondaı-aq damýyn onlaın rejımde baqylaýǵa múmkindik beretin suranystaǵy ónim. Odan bólek, jańasha júıe kún sáýlesi, jel, sý, bıomassa jáne qaldyqtardan balamaly energııa óndirý kartalaryn qamtıdy» - dedi R.Joshybaev.
Memorandýmda aımaqtyń áleýetin paıdalana otyryp, Túrkistan oblysynda sheteldik ınvestorlarmen birlesken jobalardy júzege asyrý kózdelgen. Sonymen qatar, qujatta qosymsha energııa óndirý úshin kún jáne jel elektr stantsııalarynyń qurylysyna ınvestıtsııalar tartý, energııany jáne aýdandyq gazben jabdyqtaýda resýrsty únemdeıtin tehnologııalardy qoldaný, aýyl sharýashylyǵy salasyndaǵy bıotehnologııalardy damytý, taza sýmen qamtamasyz etý joldary qaralǵan.
Qazirgi tańda Ortalyq «Bir beldeý, bir jol» baǵdarlamasy aıasynda «Astana EKSPO-2017» Halyqaralyq mamandandyrylǵan kórmesi murasynyń is júzindegi jalǵasy bolyp tabylatyn jahandyq «Silk road Super Grid» jobasyn júzege asyrýdy usynýda. Bul Qazaqstandaǵy jasyl ekonomıkanyń ilgerileýine súbeli úles qosatyny sózsiz.
