Túrkistan oblysynda jasandy talshyq óndiretin zaýyt salynyp jatyr
TÚRKІSTAN OBLYSY. QazAqparat - Búgin Túrkistan oblysynyń ákimi Janseıit Túımebaev «Badam» ındýstrııalyq aımaǵyndaǵy «Polıetılentereftalat (PET) qaldyǵynyń jasandy talshyǵy óndirisi» zaýytynyń qurylysy barysymen tanysty, dep habarlaıdy óńir basshysynyń baspasóz qyzmeti.
Osy jyldyń kúzinde tolyq qýatymen iske qosylatyn óndiris ornynyń qurylys jumysyna qanyqqan aımaq basshysy memleket tarapynan kórsetiletin barlyq qoldaýlardyń tıisti deńgeıde atqarylýyn tapsyrdy. Budan bólek, J.Túımebaev jańadan salynyp jatqan kásiporyndarǵa jańa tsıfrlyq tehnologııamen avtomattandyrylǵan basqarý júıelerin keńinen engizý qazirgi zamannyń qajettiligi ekenin aıtyp ótti. 
Investıtsııalyq quny 20 mln AQSh dollaryn quraıtyn zaýyt jylyna 50 myń tonna ónim óndirmek. Bul joba Qazaqstannyń jasandy talshyqtarǵa degen qajettiligin tolyǵymen qanaǵattandyrady dep kútilýde. Atalǵan joba elimizde alǵash ret qolǵa alyndy. Óńirdiń áleýmettik-ekonomıkalyq damýyna serpilis beretin zaýyt iske qosylǵan kezde 200-250 adam jumyspen qamtylady dep josparlanyp otyr.
Jasandy talshyq - bul ónerkásiptiń barlyq salalarynda qoldanylatyn ámbebap materıal. PET-ti qaıta óńdeý Qazaqstandaǵy ekologııalyq jaǵdaıdy jaqsartýǵa áser etedi.
Eske salaıyq, bul joba «Ontustik Invest-2016» halyqaralyq ınvestıtsııalyq forýmy aıasynda qol qoıylǵan yntymaqtastyq týraly memorandýmnyń nátıjesinde júzege asyrylyp otyr. Jobany álemge tanymal sheteldik HONGKONG TIANRUN CO...LTD iri óndiris kompanııasy oblys ákimdigimen jáne Green Technology Industries kompanııasymen birlese salýda. Búginde bul kompanııa 70 memlekette óndiris oryndaryn ashyp úlgergen.
Aıta keteıik, atalǵan ındýstrııalyq aımaqta 1 583 jumys orny ashylyp, sommasy 65 716,9 mln teńgeni quraıtyn 12 joba iske asyrylýda. Sonyń ishinde 107 jumys ornymen qamtylǵan, qarjysy 7 788,9 mln teńgeni quraıtyn 3 joba iske qosylǵan.
