Túrkistan oblysynda janar-jaǵarmaı baǵasy turaqty
Óńirde AI-92 markaly benzınge degen qajettilik naýryz aıyna 26 000 tonnany, al dızel otynyna 28 000 tonnany quraǵan. Qazirgi kezde beketterdegi qaldyq qory jetkilikti.
Bul týraly oblystyq ınvestıtsııa jáne eksport basqarmasy basshysynyń orynbasary Nurgúl Ábdirazaqova aıtyp ótti.
«Oblysta kúndelikti janar-jaǵar maı quıý beketterindegi baǵalar boıynsha monıtorıng júrgizilýde. Eger baǵany negizsiz kótirgen beketter anyqtalsa shara kóriledi. Óńirdegi janar jaǵar maı baǵasy úkimetpen bekitilgen shekti baǵadan aspaıdy jáne jetispeýshilik saldary baıqalmaıdy», - dedi ol.
Jalpy Túrkistan oblysy aýmaǵynda ótken jylmen salystyrǵanda AI-92 benzıniniń ortasha baǵasy 20,8%, dızel otyny 28%, AI-95 benzıniniń ortasha baǵasy 24% ósken. Degenmen, shekti baǵadan aspaǵan.
«Álemdegi oryn alyp jatqan jaǵdaıǵa baılanysty bizdegi janar jaǵar maı baǵasy ósedi degen qaýip joq. Jaǵdaı QR Energetıka mınıstrliginiń negizi baqylaýynda. Eshqandaı alańdaýshylyq týdyryp otyrǵan joq», - dedi Nurgúl Perdebaıqyzy.
Búgingi tańda óńirdegi janar-jaǵar maı quıý beketterinde bir lıtr AI-92 markaly benzın 174,2 teńgeden, AI-95 benzıni 205,6 teńgeden satylýda. Al, dızeldi otynnyń baǵasy - 224,9 teńgeni kuraıdy. Al, iri janar-jaǵar maı quıý beketterinde AI-92 benzınniń baǵasy 175-179 teńge, dızeldi otyn 225-230 teńge aralyǵynda satylyp jatyr.
