Túrkistan oblysynda jańadan tóselgen joldardan 114 zańbuzýshylyq deregi anyqtalǵan
TÚRKІSTAN. QazAqparat - Túrkistan oblysynda jańadan tóselgen joldardan 114 zańbuzýshylyq deregi anyqtalǵan. Bul týraly Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti basshysynyń birinshi orynbasary Mıras Qarǵabaı málimdedi, dep habarlaıdy QazAqparat tilshisi.
Óńirde «Sapaly jol - Adaldyq alańy» jobasy aıasynda ótken jyly atqarylǵan jumystardy baıandaǵan Mıras Qarǵabaı avtokólik joldarynyń sapasy men qaýipsizdigin arttyrý, bıýdjet qarajatynyń tıimdi jumsalýyn qadaǵalaý men jańa tóselgen joldardyń sapasyna qoǵamdyq baqylaý kúsheıtilgenin jetkizdi.
Departament atalǵan joba sheńberinde respýblıkalyq, oblystyq, aýdandyq jáne jergilikti joldardyń sapasyna turaqty negizde monıtorıng jumystaryn júrgizgen. Sondaı-aq, turǵyndardyń aryz-shaǵymy negizinde «Túrkistan – adaldyq alańy» jobalyq keńsesiniń menedjerleri men «Jol aktıvteri ulttyq sapa ortalyǵynyń» óńirlik fılıaly ınjenerleriniń qatysýymen júrgizilgen zerdeleý jumystarynyń nátıjesinde kóptegen kemshilikter anyqtalǵan.
«Óndiristik-tehnıkalyq qujattamanyń júrgizilmegendigi, asfalt-beton jamylǵysyndaǵy kedir-budyr bólikter, jolda syzattardyń bolýy, synýlar men yǵysýlardyń oryn alýy, jol jıekteriniń buzylǵandyǵy jáne asfalt-beton jamylǵysynan alynǵan synamalar bekitilgen talapqa sáıkes kelmeıtindigi belgili bolǵan.
Budan bólek, jyljymaly zerthanalyq kólik arqyly kúre joldardan synamalar alý barysynda anyqtalǵan kemshilikterdi joıý boıynsha merdiger mekeme basshylaryna akt jasalyp, jańadan salynǵan sapasyz joldardy qaıta qalpyna keltirý boıynsha jaýapty qala, aýdan ákimderine naqty usynystar joldanǵan. Bul kemshilikterdi joıý boıynsha keltirilgen usynystardyń negizinde tıisti jumystar atqarylyp, búgingi kúni 114 buzýshylyqtyń 97-si (86%) qalpyna keltirilgen»,- dedi Mıras Qarǵabaı.
Sonymen qatar, baspasóz jıynynda «Sapaly jol – adaldyq alańy» jobasy sheńberinde ótken jyly departament tarapynan 78 nysanǵa júrgizilgen zerdeleý jumystarynyń nátıjesinde, jalpy quny 12 886,2 mln teńgeni quraıtyn bıýdjet qarjysynyń tıimdi jumsalýy baqylaýda bolǵandyǵy aıtyldy.
Mıras Qarǵabaı bıýdjet qarjysynyń tıimdi jumsalýyn qadaǵalaý jáne jol tóseliminiń sapasy men qaýipsizdigine qoǵamdyq baqylaýdy kúsheıtý - Agenttiktiń qolǵa alǵan iri jobalarynyń biri ekendigin tilge tıek etip, aldaǵy ýaqytta oblysqa qarasty avtokólik joldarynyń sapasyn baqylaý jumystary ári qaraı da óz jalǵasyn tabatynyn atap ótti.
