Túrkistan oblysynda jańadan salynǵan 600 oryndyq mektep paıdalanýǵa berildi
TÚLKІBAS. QazAqparat – Túrkistan oblysy Túlkibas aýdanynda áleýmettik mańyzy bar nysandardyń qatary tolyqty. Azattyq aýylynda jańadan salynǵan 600 oryndyq mektep paıdalanýǵa berildi, dep habarlaıdy QazAqparat tilshisi.
Jańa ǵımarat zaman talabyna saı jabdyqtalǵan. Munda muǵalimder men oqýshylar úshin barlyq jaǵdaı jasalǵan. Barlyq pán kabınetteri men sheberhanalar, sportzal, akt zaly, kitaphana, ashana jáne medıtsınalyq kabınettermen qamtylǵan. Zamanaýı úlgide salynǵan bilim oshaǵynyń ashylý saltanatyna aýdan ákimi Nurbol Turashbekov qatysyp, jınalǵan qaýymdy Bilim kúnimen quttyqtady.
«Elbasymyz N.Á.Nazarbaev «Zamanaýı álemde eldiń qýaty eń aldymen azamattarynyń bilimimen ólshenedi» degendeı, biz keleshek urpaqqa jaqsy bilim berýdi basty nazarda ustaýymyz qajet. Al, jastarymyzdyń sapaly bilim alýyna jaǵdaı jasaý - sizder men bizdiń basty mindetimiz. Sondyqtan bolashaq urpaq úshin aıanbaı eńbek eteıik, qadirli ustazdar. Jas urpaq bilimdi, tárbıeli azamat atansa, ol - órkenıetti elderdiń qataryna qosylýdyń bir kilti»,- dedi aýdan basshysy.
Qýanyshty sátti tamashalaýǵa jınalǵan aýyl turǵyndary aýdan basshylaryna rızashylyqtaryn bildirip, qarııalar aq batasyn berdi. Sonymen qatar, saltanatty jıynda aýdandyq qoǵamdyq keńesiniń tóraǵasy Ó.Mátkerımov, aýdandyq ardagerler keńesiniń tóraǵasy S.Qasymbek jáne bir top zıaly qaýym ókilderi merekege oraı quttyqtaýlaryn jetkizip, oqýshylar men ustazdardyń jáne ata-analardyń qýanyshyn bólisip, izgi tilegin joldady.
