Túrkistan oblysynda jańadan salynǵan 484 joldan 618 kemshilik anyqtaldy
TÚRKІSTAN. QazAqparat - Oblystaǵy jańadan salynǵan joldardan 618 kemshilik anyqtaldy. Ásirese, aýdandyq mańyzy bar joldardan alynǵan synamalardyń 35 paıyzy normaǵa saı emes, dep habarlaıdy QazAqparat tilshisi.
«Jol aktıvteriniń ulttyq sapa ortalyǵy» RMK Túrkistan oblystyq fılıalynyń mamandary ótken jyly salynǵan 484 nysandy tekserip, 618 kemshilik tirkepti. Ásirese, aýdandyq joldardan alynǵan synamalardyń 35 paıyzy normaǵa saı emestigin kórsetken.
Mamandardyń aıtýynsha, bul jergilikti turǵyn úı-kommýnaldyq sharýashylyǵy, jol bólimi qyzmetkerleriniń biliktiligi tómendiginen bolyp otyr.
«Atalǵan salada eńbek etetin qyzmetkerlerdiń 10 paıyzynda ǵana tıisti dıplom bar, ıaǵnı aýdandardaǵy ınfraqurylymǵa jaýap beretin mamandardyń 90 paıyzynyń jol qurylysyna qatysty tehnıkalyq bilimi nemese kásibı tájirıbesi joq», - deıdi «Jol aktıvteriniń ulttyq sapa ortalyǵy» RMK bólim basshysy Baýyrjan Jeksenbekov.
Bul máseleni sheshý maqsatynda kásiporyn ár óńirdiń aýdan, qalalaryndaǵy mamandardy oqytýdy qolǵa alyp otyr. Búgin olar Shymkent qalasy men Túrkistan oblysynda semınar ótkizdi. Jolǵa jaýapty mamandardy ortalyqtyń materıaldyq-tehnıkalyq bazasymen, zerthana jumysymen tanystyrdy. Jol sapasyna qatysty tyń tájirıbelermen bólisti.
Aıta keteıik, elimizde kirme joldardy qadaǵalaıtyn 21 kompanııanyń qyzmet kórsetý tarıfi 80% tómendedi.
