Túrkistan oblysynda jańa týǵan nárestelerge dombyralar tartý etildi
TÚRKІSTAN. QazAqparat -Túrkistan oblysynda «Ulttyq dombyra kúnine» oraı oblystyq etnomádenı birlestikterdiń tóraǵalary perzenthanalarǵa baryp, jańa týǵan nárestelerge dombyralar tartý etti, dep habarlaıdy QazAqparat tilshisi.
Túrkistan oblystyq Qazaqstan halqy Assambleıasynyń uıymdastyrýymen óńirdegi barlyq perınataldyq ortalyqtarda búgin jaryq dúnıe esigin ashqan sábılerge izgi tilek jazylǵan hattar tapsyrylyp, ata-analaryna arnaıy syılyqtar berildi.
«Ulttyq dombyra kúniniń belgilenýi barshamyzdy erekshe qýantyp otyr. Elbasynyń qoldaýymen júzege asyp jatqan aıtýly kún ulttyq mádenıet pen biregeılikti saqtaý, qaıta jańǵyrtý ıdeıasynyń tóńireginde qoǵamdy odan ári toptastyra túsedi. Eldegi ıgi bastamalarǵa únemi qoldaý kórsetip kele jatqan etnomádenı birlestikterdiń músheleri búgin dúnıege kelgen sábılerge qazaqtyń qasıetti dombyrasyn tartý etip, izgi tilegimizdi arnadyq», -dedi oblystyq kúrd etnomádenı birlestiginiń tóraǵasy Ázimbaı Nadırov.
Aıta keteıik, shildeniń alǵashqy jeksenbisin ulttyq aspabymyzdyń tól merekesine aınaldyrý týraly jaqynda ǵana Memleket basshysy Nursultan Nazarbaevtyń Jarlyǵy shyqqan bolatyn. Bul rette Oblystyq etnomádenı birlestikterdiń ókilderi ulttyq biregeılikti saqtap, qoǵamdy biriktire túsetin dombyra kúni aıasynda ótip jatqan barlyq sharalarǵa belsene qatysýda.
