Túrkistan oblysynda jańa fýtbol komandasy paıda boldy
NUR-SULTAN. QazAqparat - Fýtboldan Qazaqstan birinshiliginiń ekinshi lıgasynda Túrkistan oblysynan taǵy bir komanda oıyn kórsetedi, dep habarlaıdy QazAqparat tilshisi.
«Temirlan» komandasy 2020 jyldyń qańtar aıynda qurylǵan. Komanda Túrkistan oblysy Ordabasy aýdanynyń ortalyǵy - Temirlan eldi mekeniniń atynan synǵa túsedi. Eldi meken Shymkent qalasynan 40 shaqyrym jerde ornalasqan.
Komanda óz oıyndaryn Temirlan eldi mekenindegi Qajymuqan atyndaǵy stadıonda ótkizedi. Stadıon 1000 jankúıer qabyldaı alady.
«Temirlan» komandasyna bas bapker qyzmetine 64-jastaǵy maman Shaızıdın Kenjebaev taǵaıyndaldy. Oǵan Fanas Salımov pen Rahmatýlla Jakýdaev kómekshilik jasaıdy.
Komanda alǵashqy oqý-jattyǵý jıynyn Shymkent qalasynda ótkizdi. Endi 21 aqpan men 9 naýryz aralyǵynda Ózbekstanda ekinshi oqý-jattyǵý jıynyna barady.
Komanda jergilikti jastardan quralǵan.
