Túrkistan oblysynda jańa aýdan qurý týraly Prezıdentke usynys berildi

TÚRKІSTAN. QazAqparat – Túrkistan oblysynda jańa Saýran aýdanyn qurý týraly QR Prezıdenti Qasym-Jomart Toqaevqa usynys berildi. Bul týraly halyqpen eseptik kezdesýinde óńir ákimi Ómirzaq Shókeev málim etti, dep habarlaıdy QazAqparat.

Túrkistan oblysynyń ákimi eseptik jıynda túrkistandyqtardy jańa Saýran aýdanynyń qurylýymen quttyqtady.

«Oblys ortalyǵy Túrkistan qalasyna kóshirilgeli beri Kentaý qalasyna onyń burynǵy 12 aýyl okrýgi berilgen bolatyn. Kentaý qalasy aýmaǵyndaǵy eldi mekenderdiń damýyna qansha kóńil bólingenimen, óńirdi ary qaraı tıimdi damytý baǵyttary meni kópten beri tolǵandyryp júrgen máselelerdiń biri bolatyn. Bulaı deıtin sebebim, qala shekarasynyń keńeıýi, turǵyndar sanynyń eki esege artýy, burynǵy Kentaý qalasy men aýyldyq okrýgterdiń qarqyndy damýy men ózekti áleýmettik máselelerin ýaqytyly, sapaly sheshýge, aýmaqty utymdy basqarýǵa birshama qıyndyqtar týyndatty. Osyǵan oraı, jańa aýdan qurý jáne jańa aýdanǵa Saýran atyn berý jóninde Memleket basshysyna usynys berildi», - dedi Ómirzaq Shókeev.

Búgingi tańda, zań talaptaryna saı tıisti qujattar rásimdelýde. Qorytyndy qujattar Úkimet pen Prezıdenttiń qaraýyna engiziletin bolady. Saýran aýdany 2021 jyly Naýryz meıramy qarsańynda qurylady dep josparlanýda.

Eske salsaq, Jańa jyl merekesi qarsańynda Ó.Shókeev Kentaý qalasy men onyń aýyldyq okrýgteriniń turǵyndarymen arnaıy kezdesip, Saýran aýdanyn qurý týraly usynysyn bildirgen bolatyn. Halyq óńir basshysynyń bastamasyn qýanyshpen qoldady.

Buǵan deıin Ómirzaq Shókeev Kentaý qalasy Túrkistan qalasymen qatar damytylatynyn aıtqan edi.