Túrkistan oblysynda Jambyl Jabaevtyń 175 jyldyǵyna oraı 60-tan astam shara ótkizilmek

TÚRKІSTAN. QazAqparat – Túrkistan oblysynda Jambyl Jabaevtyń 175 jyldyǵyna oraı eskertkishter men bıýsterine gúl shoqtary qoıý is-sharasy uıymdastyryldy. Mundaı sharalar Túrkistan qalasy, Báıdibek, Jetisaı, Ordabasy, Otyrar, Saryaǵash, Túlkibas, Qazyǵurt aýdandarynda ótkizildi, dep habarlaıdy QazAqparat tilshisi.

Barlyq karantındik shekteýlerdi saqtaı otyryp sharaǵa ardagerler, zııaly qaýym ókilderi, jastar, mektep oqýshylary qatysty. Sondaı-aq, aqyn týyndylarynan úzindiler oqyp, rýhanı azyq aldy. Búgingi tańda Túrkistan oblysynda Jambyl Jabaevtyń 175 jyldyq mereıtoıyna arnalǵan oblystyq is-sharalar jospary túzilip, Túrkistan oblysynda 60-tan astam is-shara ótkizý josparlanyp otyr.

Mádenıet jáne óner mekemelerinde jas aqyndar aıtysy men «Jambyl oqýlary» baıqaýy, «Jambylǵa arnaý» merekelik kontserti men «Jambyl – Uly Dala aqyny» ádebı sazdy keshter uıymdastyrylmaq.

Sonymen qatar teatrlandyrylǵan qoıylymdar men kórkem jáne derekti fılmderdiń kórsetilimi uıymdastyrylyp, «Jambyl Jabaev – Uly dalanyń alyp jyrshysy» oblystyq semınar-forýmy, «Óleń sózdiń dańǵyly, bar qazaqtyń – Jambyly», «Jyr alyby – Jambyl», «Júz jyl jyrlaǵan júrek «Taý men dala jyrshysy» taqyryptarynda kórme ekspozıtsııalary, mádenı is-sharalar, tanymdyq keshter, lektsııa sabaqtary jáne dóńgelek ústelder ótkizilmek.

Budan ózge, bilim berý mekemelerinde Jambyl Jabaevtyń shyǵarmashylyǵy týraly aptalyqtar, «Jyr alyby – Jambyl», «Tarıhtyń máńgilik tulǵasy», «Jambyl Jabaev júz jasaǵan báıterek», «Jambyl oqýlary» synyp saǵattar ótkizilip, mýzeı buryshtar ashylmaq.

Búginde oblysta uly aqyn esimimen 3 aýyldyq okrýg, 4 eldi meken, 84 kóshe, 12 mektep, 7 eskertkish-bıýsttar ornatylǵan.