Túrkistan oblysynda jalpyulttyq mádenı-bilim berý sharasy ótti

QR Bilim jáne ǵylym mınıstrligi tarapynan qolǵa alynǵan aýqymdy shara Alǵys aıtý kúnine oraı uıymdastyryldy, dep habarlaıdy QazAqparat tilshisi.

Atalǵan shara aıasynda óńirdegi jalpy bilim beretin mektep oqýshylary arasynda «Ushqyr oı alańy» oqýshylardyń respýblıkalyq debattyq týrnıri ótti. Al, jetim balalar men ata-anasynyń qamqorlyǵynsyz qalǵan balalarǵa arnalǵan uıymdardyń tárbıelenýshileri arasynda «Qazaqstan – meniń altyn besigim» respýblıkalyq balalar festıvali uıymdastyryldy. Іs-sharanyń qorytyndysy boıynsha barlyq qatysýshylarǵa sertıfıkattar, jeńimpazdarǵa dıplomdar men qundy syılyqtar, jetekshilerine – alǵys hattar berildi.

Aıta keteıik, balalardyń quqyqtaryn qorǵaý komıtetiniń tapsyrysy boıynsha ártúrli halyqtardyń mádenı dástúrlerin zertteý men nasıhattaý arqyly balalardyń boıynda zııatkerlikpen birge rýhanı-adamgershilik qasıetterdi damytý maqsatynda uıymdastyryldy.

Joba aıasynda respýblıkanyń barlyq mektepterinde, balalar úılerinde jáne basqa da bilim berý uıymdarynda «Rızashylyq – meıirimdilik bulaǵy» taqyrybynda túrli merekelik is-sharalar, tanymal tulǵalarmen, ardagerlermen kezdesýler, jyljymaly kórmeler, baıqaýlar ótkizildi. Jalpy, atalǵan joba balalarǵa jáne onyń ishinde jetim balalar men ata-anasynyń qamqorlyǵynsyz qalǵan jetkinshekterge, erekshe bilim berý qajettilikteri bar balalardyń boıyna meıirimdilik pen adamgershilik qasıetterin sińirýge baǵyttalǵan. Budan bólek, is-sharalar aýdan-qalalyq, oblystyq deńgeılerde ótkizilip, Túrkistan oblysynda da jalǵasyn tapty.