Túrkistan oblysynda jalpy óńirlik ónim 1 trln 103,9 mlrd teńgeni qurady
TÚRKІSTAN.QazAqparat - Búgin Túrkistan oblysynyń ákimi Janseıit Túımebaev halyq aldynda esep berip, ótken 2018 jyly óńirde atqarylǵan aýqymdy jumystarmen tanystyrdy. Jıynda aımaq basshysy oblysta jalpy óńirlik ónim kólemi 1 trln 103,9 mlrd teńgeni qurap, 2017 jyldyń tıisti kezeńimen salystyrǵanda ósim 103,9 % quraǵanyn atap ótti, dep habarlaıdy QazAqparat tilshisi.
Janseıit Túımebaevtyń aıtýynsha, óńirde kóptegen kásiporyndardyń qýatyn arttyryp, tehnologııalyq protsesti modernızatsııalaýdyń arqasynda ónerkásip sektorynyń ornyqty damýyna qol jetkizdildi.
«2018 jyly ónerkásip óniminiń kólemi 453,8 mlrd teńgeni qurap, 43,1 mlrd teńgege ósken. Óńdeý ónerkásibi de damyp keledi. Munda 236,9 mlrd teńgeniń ónimi óndirilip, 13,7 mlrd teńgege artty. Indýstrııalandyrý kartasy aıasynda 2018 jyly 10 joba iske asyrylyp, 800-den asa jumys orny ashyldy. Bıyl ındýstrııalandyrý kartasy aıasynda ınvestıtsııalyq quny 11,9 mlrd teńgeni quraıtyn 15 jobany iske asyrýdy josparlap otyrmyz», - dedi Janseıit Túımebaev.
Aımaq basshysynyń sózinshe, ótken jyly oblystyń ınvestıtsııalyq klımatyn jaqsartý úshin Elbasy Jarlyǵymen Túrkistan qalasynda 1338 gektarda «TURKISTAN» arnaıy ekonomıkalyq aımaǵy quryldy. Jumys istep turǵan shaǵyn jáne orta kásipkerlik sýbektileriniń sany - 130 804. Bul kórsetkish boıynsha oblys respýblıkada ekinshi orynǵa turaqtaǵan.
