Túrkistan oblysynda jalǵan nómirmen júrgen 8 kólik anyqtaldy
TÚRKІSTAN. QazAqparat- Túrkistan oblysynda jedel basqarý ortalyǵyna qosylǵan beınekameralar arqyly jalǵan memlekettik nómirmen júrgen 8 kólik anyqtaldy. Sondaı-aq, izdeýde júrgen 2 kólik tabyldy, dep habarlaıdy QazAqparat tilshisi.
Jyl basynan bergi úsh aı ishinde Túrkistan qalasynda ornatylǵan beınebaqylaý kameralary arqyly jalǵan memlekettik nómir taǵýdyń 8 deregi, memlekettik nómirsiz júrgen 15 kólik anyqtalǵan.
Al, terezesin kúńgirttegen 12 kólikke shara qoldanylǵan. Sondaı-aq, izdeýde júrgen 2 jeńil avtokólik tabyldy.
Búkil quqyq buzýshylyq boıynsha Qazaqstan Respýblıkasy ÁQBtK-ǵa sáıkes ákimshilik hattama toltyryldy.
Máselen, 7 naýryzda Túrkistan qalalyq polıtsııa basqarmasyna jergilikti turǵyn aryzdanǵan.
Jábirlenýshiniń aıtýynsha, ol kólik jóndeý ornyna «Mersedes-Benz-280» markaly avtokóligin qaldyrǵan.
Alaıda birer kúnnen keıin kelgende kóligin ruqsatsyz aıdap ketkender jol kólik oqıǵasyn jasaǵan.
«Kólikti mas halde basqarǵany úshin QR ÁQBtK-niń 608-babymen kináli dep tanylyp, 7 jylǵa kólik quralyn basqarý quqyǵynan aıyryldy. Sondaı-aq, 20 táýlikke ákimshilik qamaýǵa alyndy. Al, bireýdiń kóligin ruqsatsyz minip ketkeni boıynsha QR QK 200-baby 1-bóligimen sotqa deıingi tergeý amaldary júrip jatyr»,-deıdi Túrkistan oblysy polıtsııa departamentiniń baspasóz qyzmeti.
Aıta keteıik, Túrkistan oblysynda 10 dana beınebaqylaý kamerasy ornatyldy. Onyń beseýi 20 sáýirden bastap iske qosyldy.
