Túrkistan oblysynda jaldamaly qoıshy 140 bas qoıdy tanysyna satyp jibergen

TÚRKІSTAN. QazAqparat - Túrkistan oblysynda jaldamaly qoıshy ózine senip tapsyrylǵan 140 bas qoıdy tanysyna satyp jibergen. Onyń bul qylmysy qojaıynynyń qoılardy sanaý kezinde áshkere bolǵan, dep habarlaıdy QazAqparat tilshisi.

Oblystyq PD baspasóz qyzmetiniń málimetinshe, qoılardyń ıesi Otyrar aýdandyq polıtsııa bólimine qoılarynyń joǵalǵany týraly aryzdanǵan. Ol jaıylymda júrgen 750-den astam qoıyn tekserýge barǵanda 140 bas maly joq bolyp shyqqanyn jetkizgen. Osy oqıǵaǵa qatysty tekserý sharalaryn júrgizgen tártip saqshylary bul qylmysqa jábirlenýshiniń malyn senip tapsyrǵan baqtashysynyń qatysy bar ekenin anyqtaǵan. Jábirlenýshige keltirilgen shyǵyn 7 mıllıon teńge bolǵan.

«Belgili bolǵandaı, baqtashy qoılardy tanysyna árqaısysyn 35 myń teńgege satyp jibergen. Tártip saqshylary aıǵaqty zat retinde urlanǵan maldardy tárkilep aldy. Qazirgi tańda baqtashy men satyp alýshy Otyrar APB-ne jetkizdi. Atalǵan jaıt boıynsha QR QK-niń 189-baby «Senip tapsyrylǵan bóten múlikti ıemdenip alý nemese talan-tarajǵa salý» boıynsha qylmystyq is qozǵaldy. Qazirgi tańda kúdikti qamaýǵa alynyp, oǵan qatysty sotqa deıingi tergeý amaldary júrgizilýde», - delingen habarlamada.