Túrkistan oblysynda jabyq bazarlardyń qyzmeti demalys jáne mereke kúnderi toqtatyldy
TÚRKІSTAN. QazAqparat - Túrkistan oblysynda karantın men shekteý sharalary uzartyldy. Óńirdiń Bas memlekettik sanıtarııalyq dárigeri Nurbek Nyshanovtyń qaýlysyna sáıkes, azamattardyń qoǵamdyq oryndar júrip-turýyna baılanysty jáne áleýmettik, kásipkerlik nysandardyń jumys kestesine qatysty tártip sharalardyń normalary bekitilgen, dep habarlaıdy QazAqparat tilshisi.
Jańa qaýlyǵa sáıkes, jabyq bazarlardyń qyzmeti demalys jáne mereke kúnderi toqtatylǵan. Jumys kúnderi saǵat 09.00-den 19.00-ge deıin qyzmet kórsetip, úı janyndaǵy dúkenderge saǵat 09.00-den 23.00-ge deıin jumys isteýine ruqsat berilip otyr. Al, mal bazarlar sanıtarııalyq-dezınfektsııalyq rejımdi kúsheıte otyryp, tek sársenbi kúni jumys isteýine ruqsat etilgen.
Sonymen qatar, alyp ketý jáne jetkizip berý rejıminde jumys isteıtin nysandardan basqa, qoǵamdyq tamaqtaný obektileriniń qyzmeti demalys kúnderi men mereke kúnderi jumysyn toqtatýy tıis.
Dúısenbi-juma kúnderi saǵat 09.00-den 23.00-ge deıin qyzmet kórsetýge ruqsat berilse, sanıtarııalyq-dezınfektsııalyq rejımdi saqtaý arqyly 2 metr áleýmettik qashyqtyq saqtaý mindettelgen.
Al, saýda salasyndaǵy nysandar men onyń ishinde pisirilgen ónimderdi, fast-fýdty, balmuzdaqty, sýsyndardy ótkizý dúńgirshekteri qyzmeti kúsheıtilgen sanıtarııalyq-dezınfektsııalyq rejımmen saǵat 09.00-den 23.00-ge deıin jumys isteýine ruqsat berilgen. Qurylys, optıka, gúl dúkenderi men zoomagazınderdiń qyzmeti jumys kúnderi saǵat 09.00-den 18.00-ge deıin, demalys jáne mereke kúnderi jumysy toqtatylyp otyr.
Sulýlyq salondarynyń, shashtarazdardyń, SPA-ortalyqtardyń kosmetologııalyq qyzmet kórsetetin obektiler qyzmeti (1 kelýshige 4 sh.m. deıin, aldyn ala jazylý boıynsha, jazylý jýrnalyn júrgizýmen, jazylý jýrnalyn nómirleý jáne tigý) saǵat 09.00-den 21.00-ge deıin shekteledi. Monshalar men saýnalardyń qyzmeti 50 paıyzdan aspaıtyn syıymdylyqta saǵat 10.00-den 21.00-ge deıin, demalys (senbi-jeksenbi) jáne mereke kúnderi jumysy toqtatylady. Mektepke deıingi balalar mekemeleriniń kezekshi toptarynyń qyzmeti 15 adamnan artyq emes jumys isteýine ruqsat etilgen.
Fıtnes-ortalyqtary men sporttyq-saýyqtyrý ortalyqtary 30 paıyzdan aspaıtyn syıymdylyqpen, árbir janǵa 5 sharshy metr aýmaqtan kem emes, aldyn ala jazylý jýrnaly arqyly jumys istep otyr. Mundaı nysandar da demalys jáne mereke kúnderi qyzmet kórsetpeıdi.
