Túrkistan oblysynda jabaıy qaban aýlaǵan brakoner qolǵa tústi
TÚRKІSTAN. QazAqparat - Túrkistan oblysynda tabıǵat qorǵaý polıtsııasy Arys aýdanynda arnaıy reıdtik is-sharalar barysynda zańsyz jabaıy ańdardy aýlaǵan brakonerdi qolǵa túsirdi. Onyń kóligin tintý barysynda ań aýlaý qarýy men oq-dári, pyshaq jáne 30 kelige jýyq jabaıy qaban eti tárkilendi, dep habarlaıdy QazAqparat tilshisi.
Barlyq jaǵdaıdy anyqtaý úshin kúdikti polıtsııa bólimine jetkizildi. Osy jáıtke qatysty Qylmystyq kodekstiń 337 baby «Zańsyz ańshylyq» babymen is qozǵalyp, sotqa deıingi tergep-tekserýge tirkeldi. Qazirgi tańda brakonerlik deregi boıynsha sotqa deıingi tergeý júrgizilýde.
Arys aýdandyq jergilikti polıtsııa qyzmetiniń qyzmetkerleri jedel-aldyn alý sharalary kezinde sondaı-aq 4 ekologııalyq qylmys jáne 40 ákimshilik quqyqbuzýshylyq deregin áshkereledi. Atalǵan zańbuzýshylyqtardyń 10-y ań aýlaý jáne janýarlar dúnıesin paıdalaný erejesiniń talabyn, 17 balyq aýlaý erejesin jáne 16-sy basqa da tabıǵat qorǵaý zańnamasy aıasyndaǵy quqyqbuzýshylyqtar bolyp otyr. Osy derekter boıynsha turǵyndarǵa engizilgen jalpy aıyppul kólemi 250 myń teńgeni quraǵan.
