Túrkistan oblysynda zańsyz jumys istep júrgen sheteldikter anyqtaldy
TÚRKІSTAN. QazAqparat - Túrkistan oblysynda polıtseıler «Mıgrant» profılaktıkalyq is-sharasyn ótkizdi. QR ІІM-niń zańsyz kóshi-qonǵa qarsy is-qımyl men zańbuzýshylyqqa jol bergen mıgranttardy anyqtaý maqsatynda uıymdastyrylǵan sharada jasyryn túrde jumys istep júrgen sheteldikter anyqtaldy, dep habarlaıdy QazAqparat tilshisi.
Atalǵan is-shara barysynda Otyrar APB-niń jeke quram qyzmetkerleri júrgizgen is-sharalar barysynda ýaqytsha tirkelgen 416 sheteldik azamattyń turǵylyqty mekenjaıy tekserildi. Olardyń birqataryna jeke kýáliginiń merzimi ótkeni úshin QR ÁQBtK-niń 492-baby boıynsha aıyppuldar salyndy. Kúdik týdyrǵan 19 azamat Otyrar APB-ne jetkizilip, saýsaq izderi alyndy. Al, Kentaý qalasynda 37 shetel azamatyna QR ÁQBtK 517-baby boıynsha hattama toltyrylyp, eskertý berildi. 2 shetel azamaty sot sheshimimen elden alastatylyp, taǵy bir sheteldikke aıyppul salyndy. Kenshiler qalasyndaǵy 63 sheteldik azamattyń jeke basyn anyqtaý jumystary júrgizilip, zańbuzýshylyqqa jol bergen sheteldikter ákimshilik jazaǵa tartyldy. Sheteldik mıgranttardyń keıbiriniń Qazaqstanǵa kelip-ketý tártibin buzǵany anyqtalsa, endi biri ruqsatsyz tabys taýyp júrgeni belgili boldy.
