Túrkistan oblysynda zańsyz jer qoınaýyn paıdalanýshylarmen kúres kúsheıtiledi
TÚRKІSTAN. QazAqparat - Túrkistan oblysynda zańsyz jer qoınaýyn paıdalanýshylarmen kúres kúsheıtiletin boldy. Sebebi óńirdiń Keles, Saıram, Aqsý, Arys jáne Badam ózenderiniń arnasy jyl saıyn tómendep keledi, dep habarlaıdy QazAqparat tilshisi.
Zańsyz jer qoınaýyn paıdalaný jaǵdaılary ásirese, ózen ústinen ótetin oblystyq mańyzy bar joldardyń jáne ondaǵy kópirlerdiń merziminen buryn apatty jaǵdaıǵa jetýine áser etip otyr. Mańyzdy másele jaıly Túrkistan oblysynyń ákimi Ómirzaq Shókeevtiń tórǵalyǵymen ótken apparat otyrysynda oblystyq Jolaýshylar kóligi jáne avtomobıl joldary basqarmasynyń basshysy Rolan Ibragımov baıandady.
«Kópirlerdiń temir-betondy jaǵalaýlary, sý báseńdetkishteri opyrylyp qulap, betondy qadalary ashylyp qalýda. Atalǵan jaǵdaı, adam ómirine qaýip týdyrýmen qatar, memleket qarjysynyń artyq jumsalýyna alyp kelýde. Qazirgi tańda joǵaryda atalǵan ózen arnalarynyń tómendeýi saldarynan birqatar oblystyq mańyzy bar joldardaǵy kópirler jóndeýdi qajet etip otyr», – dedi basqarma basshysy.
Oblys ákimi Ómirzaq Shókeev máseleni túbegeıli sheshýdi tıisti organ basshylaryna tapsyrdy. Zańsyz jer qoınaýyn paıdalanýshylardyń qyzmetin zańdastyrýdy nemese toqtatýdy qolǵa alýmen arnaıy qurylatyn komıssııa aınalysatyn bolady. Aımaqta jyl sońyna deıin jaqsy jáne qanaǵatty jaǵdaıdaǵy oblystyq jáne aýdandyq mańyzy bar avtomobıl joldarynyń úlesin 79%-dan 81,4%-ǵa arttyrý kózdelýde. Bul kórsetkishti 2025 jylǵa deıin 90%-ǵa jetkizý josparlanǵan.
Bıyl avtomobıl joldaryn jóndeýge bólingen qarajattyń basym bóligi jergilikti mańyzy bar joldarǵa baǵyttalady. Qurylys-jóndeý jumystarymen jalpy 300-den astam nysan, ne 1200 shaqyrymǵa jýyq joldar men kósheler qamtylǵan. Jyl sońyna deıin 700 shaqyrym jol paıdanalýǵa beriledi. Maqtaaral, Jetisaı, Keles aýdandary aýmaǵynda uzyndyǵy 478 shaqyrym jol kúrdeli jáne ortasha jóndeýden ótkizilýde. Odan bólek, osy aýdandarda oblys ákiminiń tapsyrmasymen jalpy uzyndyǵy 180 shaqyrymnan asatyn 11 oblystyq mańyzy bar avtomobıl joldary jóndelýde. Bul joldardy qyrkúıek aıynda tolyqtaı paıdalanýǵa berý josparlanǵan. Joldar Qazyǵurt, Túlkibas, Sozaq, Báıdibek aýdandary men Arys qalasynda da júrgizilip jatyr.
Aıta keteıik, aǵymdaǵy jyly Túrkistan-Baltakól, Kentaý-Aşysaı, Shymkent-Qaramurt, Aqsýkent-Qaramurt, Shymkent-Saıram, Sharaphana-Jańabazar baǵyttaryndaǵy joldardy paıdalanýǵa berý jáne Maqtaaral, Jetisaı, Keles aýdandaryndaǵy oblystyq mańyzy bar avtomobıl joldaryn retke keltirý aıaqtalady dep kútilýde.
