Túrkistan oblysynda zańsyz salynǵan 67 nysan buzyldy
TÚRKІSTAN. QazAqparat - Túrkistan oblysynda ótken jyly 2700-ge tarta qurylys nysandary tekserýden ótti. Olardyń qatarynda bıýdjettik, áleýmettik, jeke turǵyn úı jáne kásipkerlik nysandar bar. Bul týraly búgin óńirlik kommýnıkatsııalar qyzmetinde oblystyq memlekettik sáýlet-qurylys baqylaýy basqarma basshysynyń orynbasary Muhıt Turysbekov málim etti, dep habarlaıdy QazAqparat tilshisi.
2018 jyly atqarylǵan jumystar týraly baıandama jasaǵan basqarma basshysynyń orynbasary zańdarda belgilengen normalar men talaptardy buza otyryp salynǵan nysandarda anyqtalǵan kemshilikterge toqtaldy. Onyń sózinshe, 430 nysan tekserilip, kemshilikterge jol berilgeni úshin zań aıasynda tıisti sharalar qoldanylǵan.
«Ákimshilik quqyqbuzýshylyq jóninde 724, bıýdjettik nysandar boıynsha 162, jeke nysandar boıynsha 562 hattama toltyrylǵan. Olardyń barlyǵy derlik sotqa joldandy. Jalpy basqarma tarapynan salynǵan ákimshilik aıyppul somasy - 106 mln 695 myń teńgege jetken. Onyń 99 mln 167 myń teńgesi óndirilgen. Aıyppul mólsheri ótken jylmen salystyrǵanda birshama azaıǵan», - dedi Muhıt Turysbekov.
Basqarma basshysynyń orynbasary sondaı-aq, ótken jyly oblysta zańsyz salynǵan 67 nysan buzylǵanyn atap ótti. Máselen, Tólebı aýdanyndaǵy Ál-Farabı orta mektebinde oqý blogy, sport zaly, ashana, sheberhana jáne kitaphananyń qurylys nysany qurylys salasyndaǵy talaptardy saqtamaı salynǵan. Sapasyz qurylys montaj jumystaryn júrgizgeni úshin «ıÝgın Stroı LTD» JShS-ne 240500 teńge aıyppul salynyp, óndirildi. Sondaı-aq, tıisti talaptardy saqtamaǵan Arys qalasy, «Kóktem-2» turǵyn aýdanyndaǵy kópqabatty turǵyn úılerdiń tehnıkalyq qadaǵalaýshy attestaty 6 aıǵa toqtatyldy. Odan bólek, Ordabasy aýdany Temirlan eldimekeninde eki qabatty kommýnaldyq turǵyn úıiniń sapasyz qurylysy úshin bas merdiger mekeme «StroıJolServısKZ» JShS-ne ákimshilik shara qoldanylyp, 240 500 teńge aıyppul salynǵan.Al, Túrkistan qalasynda 43 nysan buzyldy.
