Túrkistan oblysynda zańsyz salynǵan 139 nysan anyqtaldy
TÚRKІSTAN. QazAqparat - Túrkistan oblystyq memlekettik sáýlet-qurylys baqylaý basqarmasy zańsyz salynǵan 139 qurylys nysanyna tekserý júrgizdi, dep habarlaıdy QazAqparat.
QR Ákimshilik quqyq buzýshylyq týraly Kodeksine sáıkes zańsy salynǵan nysandarǵa 206 hattama toltyrylǵan. Jalpy salynǵan 47 892 765 teńge aıyppuldyń búgingi kúnge 66 paıyzy óndirilip, 2020 jylmen salystyrǵanda kórsetkish 2,7 ese ósip otyr. Bul týraly brıfıngte 9 aıda atqarǵan jumystaryn qorytyndylaǵan basqarma basshysynyń orynbasary Saparǵalı Saldarov málimdedi.
Onyń aıtýynsha, basqarma tarapynan 5 memlekettik qyzmet kórsetiledi. Olar 100% elektrondy formatta.
«Aǵymdaǵy jylǵy III-toqsannyń qorytyndysy boıynsha qurylys salasynda basqarma tarapynan barlyǵy 749 ótinish qabyldanǵan. Onyń ishinde lıtsenzııa boıynsha 270 ótinish tirkelip, 92-i qanaǵattandyryldy. Attestattaý boıynsha 479 ótinish tirkelip, onyń 262-si attestattaldy. Sáýlet, qala qurylysy jáne qurylys salasyndaǵy jobalardy basqarý jónindegi uıymdardy akredıtteý boıynsha 1 ótinish túsip, qanaǵattandyryldy», - dedi Saparǵalı Baýyrjanuly.
Túrkistan oblysynda aǵymdaǵy jyldyń qańtar-qyrkúıek aılary aralyǵynda 542 nysannyń qurylysy júrgizilýde, onyń ishinde 254-i - bıýdjet qarajaty esebinen, 275-i —jeke kásipkerlik qarajaty esebinen, 13-i - ınvestıtsııalyq qarjy esebinen salynýda.
Qurylys nysandaryn jobalaý aldyndaǵy izdestirý, jobalaý, qurylys-montajdaý jumystaryn oryndaý barysynda qurylys normatıvteriniń talaptaryn buzǵany úshin 2-jobalaýshy, 11-merdiger mekemege QR ákimshilik quqyq buzýshylyq týraly Kodeksiniń 312 babymen 100-700 AEK aralyǵynda aıyppul salynǵan.
Sondaı-aq, 10 tehnıkalyq qadaǵalaýshy tulǵaǵa tehnıkalyq qadaǵalaý júrgizý quqyǵyna sarapshy attestatynyń qoldanysyn alty aı merzimge toqtata turyp, 180 AEK mólsherinde aıyppul salý arqyly ákimshilik sharalar qoldanylǵan.
