Túrkistan oblysynda zańsyz pırotehnıkalyq ónim satýshylarmen kúres jalǵasýda
TÚRKІSTAN.QazAqparat – Túrkistan oblysynyń tártip saqshylary Jańa jyl merekesi qarsańynda lıtsenzııasyz pırotehnıkalyq ónimderdi saýdalaýshylarmen kúresti jalǵastyrýda, dep habarlaıdy QazAqparat.
Túrkistan oblystyq Polıtsııa departamenti baspasóz qyzmetiniń habarlaýynsha, bul baǵyttaǵy jumystar bıylǵy 26-shy jeltoqsanan bastalǵan jáne 2021 jyldyń 10-shy qańtaryna deıin jalǵasady.
Arnaıy júrgizilgen tekserý jumystarynyń barysynda sertıfıkaty joq pırotehnıkalyq buıymdardy satýdyń 4 deregi anyqtalǵan. Olardyń 3-ýi Túrkistan qalasynan anyqtaldy. Al qalǵan 1 jaǵdaı Maqtaaral aýdana tıesili bolyp otyr.
Atalǵan quqyqbuzýshylyq boıynsha polıtseıler QR-niń ÁQBtK 196-baby- «Taýarlarmen nemese ózge de zattarmen zańsyz saýda jasaý» áreketi boıynsha ákimshilik hattama toltyrdy. Sonymen qatar kináli adamadarǵa 138900 teńge ákimshilik aıyppul salynady.
«Bul is-sharany ótkizý eń aldymen jańa jyldyq merekeler kezinde qoǵamdyq tártip pen azamattardyń qaýipsizdigin qamtamasyz etýge, sondaı-aq balalar men eresekter arasynda jaraqat alý jaǵdaılarynyń aldyn alýǵa baǵyttalǵan. Sondyqtan Túrkistan oblysynyń polıtseıleri azamattardy pırotehnıkany paıdalaný kezinde qaýipsizdik erejelerin qatań saqtaýǵa, sondaı-aq jańa jyldyq ónimdi tek ony ótkizý úshin arnaıy bólingen saýda oryndarynan satyp alýǵa shaqyrady»,-delingen habarlamada.
