Túrkistan oblysynda zańsyz oıyn keńselerin baqylaýda ustaǵan qylmystyq top anyqtaldy
TÚRKІSTAN. QazAqparat – Túrkistan oblysynda zańsyz oıyn keńselerin baqylaýda ustaǵan uıymdasqan qylmystyq top anyqtaldy. Atalǵan top múshelerin QR QM Qarjy monıtorıngi komıtetiniń Óńirlik ekonomıkalyq tergeý departamentiniń qyzmetkerleri ustaǵan, dep habarlaıdy QazAqparat tilshisi.
Qarjy monıtorıngi komıtetiniń málimetinshe, oblysta naqty josparlanǵan jáne júrgizilgen arnaıy operatsııa nátıjesinde uzaq ýaqyt boıy Maqtaaral jáne Jetisaı aýdandarynyń Ózbekstanmen shekaralas aýmaǵynda áreket etken qylmystyq toptyń zańsyz áreketteri áshkere bolǵan.
«QR QM Qarjy monıtorıngi komıtetiniń Óńirlik ekonomıkalyq tergeý departamentiniń qyzmetkerleri zańsyz oıyn bıznesin uıymdastyrý boıynsha qyzmettiń jolyn kesti. Sondaı-aq, aınalymǵa qylmystyq jolmen alynǵan qarajat tartylyp, keıin «StavkaBet» býkmekerlik keńsesiniń resmı jelisi arqyly zańdastyryldy. QR Ulttyq gvardııasynyń arnaıy maqsattaǵy bólimshesiniń qoldaýymen jedel tergeý toby qylmystyq top músheleriniń baqylaýyndaǵy 7 zańsyz oıyn keńselerinde bir mezgilde tintý júrgizdi. Tintý barysynda uıymdasqan qylmystyq topty uıymdastyrýshysynyń Shymkent qalasyndaǵy úıinen 7 mln AQSh dollary men 7 mlrd teńgeniń múlkin zańdastyrý týraly jazbalar bar qoıyn dápter tabylyp, tárkilendi», delingen habarlamada.
Sonymen qatar sot uıymdasqan qylmystyq top uıymdastyrýshysyna tıesili Shymkent qalasy men Túrkistan oblysy aýmaǵynda ornalasqan 25 menshik nysanyna (úı, meıramhana, býkmekerlik keńselerdiń oıyn zaldary, jer telimderi, avtokólikter) tıym salynǵan. Toptyń basqa da belsendi múshelerine tıesili 11 múlik nysan da tárkilengen.
